سابق وفاقی وزیر شیخ رشید نے کہا ہے کہ عمران خان کو قتل کرنے کا منصوبہ ناکام ہوچکا ہے لیکن ان کی جان کو اب بھی خطرہ ہے۔
بول نیوز سے خصوصی گفتگو کرتے ہوئے شیخ رشید کا کہنا تھا کہ معاشی صورتحال انتہائی گھمبیر ہے اور حل صرف انتخابات ہیں لیکن عمران خان کے مزید سرپرائز کا مجھےعلم نہیں ہے۔
انہوں نے کہا کہنا کہ اہم تعیناتی کا فیصلہ 5 روزمیں ہوجائے گا لیکن اس معاملے کو جتنا زیر بحث لایا گیا ہے وہ خوش آئند بات نہیں ہے۔
انہوں نے مزید کہا کہ اہم تعیناتی تک سیاسی عدم استحکام رہے گا اور جوبھی نیا آرمی چیف آئے گا وہ سیاسی گند اپنےکندھوں پر نہیں اٹھائے گا، وہ ملک کو نئے انتخابات کی طرف لے کرجائے گا۔
سابق وزیر داخلہ کا کہنا تھا کہ راناثنااللہ نے کہا کہ بغیر سمری کے بھی تعیناتی کرسکتے ہیں اور بیان سے لگتا ہےمعاملات اتنے ٹھیک نہیں جتنے بتائے جارہے ہیں جبکہ دستاویزات لیک کرنا بھی ثبوت ہے کہ حالات ٹھیک نہیں ہیں، ایسا وہی لیک کرتے ہیں جو بعد میں تحقیقات کاحکم دیتے ہیں۔
بعدازاں اپنے ایک پیغام میں بھی شیخ رشید کا کہنا تھا کہ جب تک نئےآرمی چیف کی تعیناتی کا مسئلہ حل نہیں ہوگا اس وقت تک سیاست میں ٹھہراؤ نہیں آئے گا۔
جب تک نئےآرمی چیف کی تعیناتی کامسئلہ حل نہیں ہوتاسیاست میں ٹھہراؤنہیں آئےگاراناثنااللہ کابیان بغیرسمری کےبھی نیاآرمی چیف تعینات کردیں گےخطرےکی گھنٹی ہےوزیر داخلہ کےبیان سےواضح ہےسب اچھا نہیں سب ایک پیچ پے نہیں ہیں خودہی اثاثوں کےریکاڈکولیک کرواتےہیں خودہی تحقیقات کاحکم دیتےہیں
— Sheikh Rashid Ahmed (@ShkhRasheed) November 22, 2022
خیال رہے کہ گزشتہ روز سماجی رابطے کی ویب سائٹ ٹوئٹر پر اپنے جاری کردہ بیان میں شیخ رشید نے کہا کہ نواز شریف کیر ٹیکر کا دوراینہ بڑھوانا چاہتا ہے اور من پسند کی تعیناتی بھی چاہتا ہے، ایک ٹکٹ میں 2 مزے نہیں مل سکتے۔
انہوں نے کہا کہ عمران خان کو کسی کی تعیناتی پر اعتراض نہیں، جو بھی نیا آرمی چیف آئے گا وہ سیاسی گند اپنے کندھوں پر نہیں اٹھائے گا اور ملک کو الیکشن کی طرف لے کر جائے گا۔
‘پی ڈی ایم کا سیاسی جنازہ نکل چکا ہے’
سابق وفاقی وزیر داخلہ کا کہنا ہے کہ پی ڈی ایم کا سیاسی جنازہ نکل چکا ہے جس کی سیاسی چیخیں بلاول کی پریس کانفرس میں واضح ہیں۔
پی ٹی آئی رہنما نے کہا کہ ملک کا وزیر خارجہ بلاول اپنے ملک کے صدر کو دھمکیاں دے رہا ہے، مانگے تانگے کی حکومت کا یہی نتیجہ ہوتا ہے۔
‘آئندہ 5 روز سیاست میں فیصلہ کن ہیں’
انہوں نے کہا کہ آئندہ 5 روز سیاست میں فیصلہ کن ہیں، کورونا یا ڈرونا کا فیصلہ بھی 72 گھنٹوں میں ہو جائے گا۔
پی ٹی آئی رہنما نے مزید کہا کہ 26 نومبر کو عمران خان کا راولپنڈی میں تاریخی استقبال کریں گے۔
شیخ رشید نے کہا کہ رانا ثناءاللہ نے بیان دیا ہے کہ عمران خان کی جان کو دشمن ملک کی ایجنسیوں سے خطرہ ہے، میں پوچھنا چاہتا ہوں کہ ملک دشمن ایجنسیوں کو کاؤنٹر کرنا کیا حکومت کی ذمہ داری نہیں۔
انہوں نے مزید کہا کہ پہلے معیشت کو تباہ کیا اور اب وزیرداخلہ اور وزیرخارجہ کے بیہودہ بیانات جگ ہنسائی کا باعث بن رہے ہیں، 26نومبر یومِ انقلاب ہے۔
‘عمران خان کی جان کو ابھی بھی خطرہ ہے’
گزشتہ روز میڈیا سے گفتگو کرتے ہوئے شیخ رشید احمد نے کہا تھا کہ ہمارا مطالبہ ہے کہ جلد انتخابات کرائے جائیں، لانگ مارچ کا تاریخی اجتماع ہوگا، سارا پاکستان راولپنڈی پہنچ رہا ہے، عمران خان کی جان کو ابھی بھی خطرہ ہے لیکن پھر بھی عمران خان 26 نومبر کو راولپنڈی پہنچیں گے۔
عوامی مسلم لیگ کے سربراہ شیخ رشید احمد نے مزید کہا تھا کہ ملکی معیشت تباہ ہوگئی ہے، حکمرانوں کا جانا ٹھہر چکا ہے، انہیں جانے سے کوئی نہیں بچا سکتا۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News