پاکستان پیپلز پارٹی کے چیئرمین اور وزیرِ خارجہ بلاول بھٹو زرداری نے صوبہ خیبرپختونخواہ کے رہنما اور پارٹی کے ٹکٹ ہولڈر حاجی منظور خلیل اور ان کے بھائی واحد خلیل کے قتل کی شدید الفاظ میں مذمت کی ہے۔

اپنے ایک بیان میں پی پی پی چیئرمین نے کہا کہ حاجی منظور خلیل اور ان کے بھائے واحد خلیل کا بہیمانہ قتل درندگی ہے، جس کی جتنی مذمت کی جائے کم ہے۔

بلاول بھٹو نے یہ بھی کہا کہ حاجی منظور خلیل شہید کے قتل سے پارٹی ایک مخلص رہنما سے محروم ہوگئی۔

وزیرِ خارجہ نے زور دیا کہ خیبرپختونخواہ کی صوبائی حکومت قاتلوں کی نشاندہی کرکے انہیں انصاف کے کٹہرے میں لائے۔

انہوں نے کہا کہ صوبائی حکومت کو اپنا کردار ادا کرنا ہوگا اور اس طرح کے واقعات کی روک تھام کو یقینی بنانا ہوگا۔

بلاول بھٹو کا کہنا تھا کہ پاکستان پیپلز پارٹی اس خونِ ناحق پر خاموش نہیں بیٹھے گی اور وہ مظلوم خاندان کو انصاف دلوائیں گے۔

ان کا یہ بھی کہنا تھا کہ میں شہداء کے لواحقین کے دکھ میں برابر کا شریک ہوں، اور دعاگو ہوں اللہ تعالیٰ انہیں صبر جمیل عطا فرمائے۔

اپنے بیان میں وزیرِ خارجہ بلاول بھٹو زرداری نے شہید حاجی منظور خلیل اور شہید واحد خلیل کے درجات کی بلندی کے لیے بھی دعا کی ہے۔