بلوچستان میں مون سون بارشوں اور سیلاب کے باعث تین ماہ سے تعطل کا شکار ٹرین سروس آج سے بحال کر دی جائے گی۔

ریلوے حکام کے مطابق بلوچستان سے تین ماہ بعد آج پہلی ترین پشاور کیلئے روانہ ہوگی جوکہ جعفر ایکسپریس مچھ اسٹیشن سے پشاور تک جائے گی۔

ریلوے حکام نے بتایا کہ مسافروں کو کوئٹہ اسٹیشن سے مچھ اسٹیشن ٹرانسپورٹ کے ذریعے پہنچایا جارہا ہے، 10 بوگیوں پر مشتمل ٹرین آج 11 بجے مچھ سے روانہ ہوگی، کوئٹہ تا مچھ ریلوے کا رابطہ منقطع ہے۔

ریلوے حکام کا کہنا ہے کہ بولان کے علاقے میں سیلاب کے باعث ریلوے ٹریک پل سیلاب میں بہہ گیا تھا، پل کی تعمیر کا کام جنوری میں مکمل ہوگا۔

خیال رہے کہ بارشوں کے باعث بولان ریلوے ٹریک پل بہہ جانے کی وجہ سے ریل سروس 3 ماہ سے معطل تھی۔

ریلوے کی جانب سے پشاور سے کراچی چلنے والی عوام ایکسپریس کی بحالی منسوخ

ریلوے نے پشاور سے کراچی چلنے والی عوام ایکسپریس کی بحالی منسوخ کر دی۔

 ترجمان ریلوے نے اپنے بیان میں کہا تھا کہ عوام ایکسپریس آج بحال نہیں ہو رہی، آج 20 نومبر کو اب صرف ایک ٹرین جعفر ایکسپریس بحال کی جائے گی۔

ترجمان نے کہا کہ جعفر ایکسپریس پشاور سے مچھ کے درمیان چلے گی، مچھ سے کوئٹہ کے درمیان مسافروں کو بسوں کے ذریعے پہنچایا جائے گا۔

واضح رہے کہ ریلوے نے پہلے بہاؤالدین زکریا ایکسپریس کو 20 نومبر کو بحال کرنے کا اعلان کیا تھا، اب بہاؤالدین زکریا ایکسپریس کے بجائے جعفرایکسپریس کو بحال کیا جائے گا۔

پاکستان ریلوے کے مختلف سیکشنز کے سالانہ معائنے کا نیا شیڈول جاری

چند روز قبل چیف ایگزیکٹو ریلوے اور فیڈرل گورنمنٹ انسپکٹر آف ریلوے کی مختلف سیکشنز کی سالانہ انسپکشن کا نیا شیڈول جاری کر دیا تھا۔

 چیف ایگزیکٹو ریلوے سلمان صادق شیخ اور ایف جی آئی آر راولپنڈی، کراچی اور سکھر ڈویزن کی انسپکشن کریں گے، جس کا عمل تین مرحلوں میں 21 نومبر سے 21 دسمبر تک جاری رہے گا جبکہ پاکستان ریلوے انتظامیہ نے اس کا نوٹیفکیشن بھی جاری کردیا ہے۔

نوٹیفکیشن کے مطابق پہلے مرحلے میں 21 نومبر کو لالہ موسیٰ سے راولپنڈی 157 کلو میٹر ٹریک کی انسپکشن کی جائے گی جبکہ 22 نومبر کو کندیاں، خوشاب، سرگودھا 130 کلو میٹر ٹریک کی انسپکشن کی جائے گی۔

اس کے علاوہ دوسرے مرحلے میں 5 دسمبر کو کھوکھرا پار سے میر پور خاص تک 126 کلو میٹر ٹریک کی انسپکشن کی جائے گی جبکہ 6 دسمبر کو کراچی اور 7 دسمبر کو کراچی کینٹ سے حیدر آباد 173 کلو میٹر ٹریک کی انسپکشن ہو گی۔

نوٹیفکیشن میں بتایا گیا تھا کہ تیسرے مرحلے میں 20 دسمبر کو خانپور سے روہڑی تک 212 کلو میٹر ٹریک کی انسپکشن کی جائے گی۔

نوٹیفکیشن کے مطابق 21 دسمبر کو سکھر سے جیکب آباد تک 80 کلو میٹر ٹریک کی انسپکشن ہوگی جبکہ معائنے کے دوران ٹریک، ریلوے اسٹیشنوں کی عمارات، پل سمیت دیگر تنصیبات کا جائزہ لیا جائے گا۔

خیال رہے کہ انسپکشن کے دوران مختلف ریلوے اسٹیشنوں کی آمدن اور وہاں مسافروں کو دی جانے والی سہولیات کا جائزہ لیا جائے گا جبکہ ریلوے افسروں اور ملازمین کی ڈیوٹیوں اور ان کے کام کا بھی جائزہ لیا جائے گا۔

ریلوے خسارے میں کیوں ہے؟ اہم وجہ سامنے آگئی

پاکستان ریلوے سالانہ اربوں روپے کے خسارے میں کیوں ہے ، بول نیوز نے پتہ لگا لیا۔

ریلوے حکام ٹیکنالوجی سے بھاگنے لگے، محکمہ ریلوے اگر ٹرنیوں کی وقت کی پابندی ٹھیک کرلے تو سالانہ 3 ارب روپے سے زائد ہونے والا نقصان ختم کرسکتی ہے ۔

وقت کی پابندی نہ ہونے کی وجہ سے مسافروں کو بھی شدید مسائل کا سامنا کرنا پڑتا ہے ۔سکھر ڈویژن میں جدید سگنل سسٹم لگانے کے باوجود پرانا نظام استعما ل کرنے سے ریلوے کو سالانہ کروڑوں روپے کا نقصان ہو رہا ہے ۔

کانٹینٹ سیل بول نیوز اسلام آبا دکے مطابق آڈیٹر جنرل آف پاکستان کی رپورٹ میں انکشاف ہواہے کہ ریلوے کو مختلف اسٹیشنوں پر ٹرینوں کووقت سے زیادہ روکنے کی وجہ سے سالانہ 3 ارب 6 کروڑ 58 لاکھ 90 ہزار روپے سے زیادہ نقصان ہو رہا ہے ۔

مختلف اسٹیشنوں پر شیڈول  کے بغیر اسٹاپ کرنے کی وجہ سے سالانہ 3 ارب روپے سے زیادہ ڈیزل جل جاتا ہے۔

یہ اسٹاپ سگنل سسٹم ،لوکوموٹو،کوچز و دیگر وجوہات کی وجہ سے ہوتے ہیں ۔اگر ریلوے ٹرنیوں کی وقت کی پابندی شروع کر دے تو 3 ارب روپے بچائے جا سکتے ہیں۔

سکھر ڈویژن میں ٹرنیوں کی آمد و رفت کے لیے سگنل کاجدید کمپیوٹر بیسڈ انٹر لاکنگ سسٹم (سی بی آئی ) لگا دیا گیا ہے مگر اس کے باوجود اس کو استعمال نہیں کیا جا رہا ہے اور پرانا پیپر لائن کلیئر(پی ایل سی) نظام استعمال کیا جا رہا ہے۔

پی ایل سی لینے کے لیے ٹرنیوں کو روکنا پڑتا ہے، اس کی وجہ سے صرف سکھر ڈویژن میں سالانہ 7 کروڑ 33 لاکھ 60 ہزار روپے کا اضافی ڈیزل ٹرنیوں نے استعمال کیا۔

آڈٹ نے سفارش کی کہ جب جدید سسٹم لگادیا گیا ہے تو اس کو استعمال کیا جائے تاکہ 7 کروڑ وپے سے زائد کاسالانہ نقصان روکا جا سکے۔