پاکستان تحریک انصاف کے وائس چیئرمین شاہ محمود قریشی نے کہا ہے کہ وفاقی حکومت ساری ذمہ داری عدلیہ پر کیوں ڈالنا چاہتی ہے۔

سابق وفاقی وزیر شاہ محمود قریشی نے بول نیوز سے گفتگو کرتے ہوئے کہا کہ عدلیہ کو اپنی ذمہ داری کا احساس ہے اور ادا کررہے ہیں، ساری ذمہ داری عدلیہ پر ڈال کر خود بری الذمہ ہونا کون سی منطق ہے، چیف ایگزیکٹو کے پاس تمام اختیارات ہیں اور عدلیہ پرسب ڈال رہے ہیں۔

‘اعتزاز احسن کی عمران خان سے ملاقات کا مجھےعلم نہیں’

انہوں نے کہا کہ عمران خان اور پرویزالہیٰ کے درمیان کوئی اختلافات نہیں، ن لیگ کا ڈس انفارمیشن سیل ہر جملے کو توڑ مروڑ کر پیش کرتا ہے۔

شاہ محمود قریشی نے کہا کہ اعتزاز احسن کی عمران خان سے ملاقات کا مجھےعلم نہیں، اعتزازاحسن اور عمران خان ایک ہی ادارے میں پڑھتے رہے، اعتزاز احسن تیمارداری کیلئے آرہے ہیں تو ویلکم کرینگے۔

‘عمران خان مارچ کو لیڈ کرنے کی حالت میں نہیں’

سابق وفاقی وزیر کا کہنا ہے کہ عمران خان مارچ کو لیڈ کرنے کی حالت میں نہیں، عمران خان اس پوزیشن میں نہیں کہ سفر کرسکیں، عمران خان ابھی چل نہیں سکتے۔

انہوں نے کہا کہ عمران خان کی زیرصدارت مشاورتی اجلاس 2 بجے ہوگا، اجلاس میں تمام صورتحال پر تبادلہ خیال ہوگا۔

شاہ محمود قریشی نے مزید کہا کہ عمران خان سب کی تجاویزسن کر فیصلہ کرینگے اور مشاورت کے بعد اگلےلائحہ عمل کا اعلان کیا جائے گا۔

فرخ حبیب کی بول سے گفتگو

دوسری جانب پی ٹی آئی رہنما فرخ حبیب نے بھی بول نیوز سے گفتگو کرتے ہوئے کہا کہ عمران خان کی ریکوری میں کچھ وقت لگے گا، مطالبات کی منظوری تک احتجاج جاری رہے گا۔

انہوں نے کہا کہ حقیقی آزادی مارچ کی تحریک پورے پاکستان میں شروع ہوچکی ہے، ڈاکٹرز کی اجازت کے بعد عمران خان دوبارہ کال دیں گے، عمران خان اسپتال سے روانہ ہوکر پریس کانفرنس کرینگے۔

فرخ حبیب نے مزید کہا کہ رائیونڈ اجتماع کے باعث آج احتجاج معطل کردیا، مختلف شہروں میں آج احتجاج ہوگا، مخصوص شاہراہیں بند نہیں کرینگے۔