گورنر سندھ نے کہا ہے کہ ملک و قوم کی زیادہ سے زیادہ خدمت کرنا میرا مشن ہے۔

تفصیلات کے مطابق  گورنرسندھ کامران خان ٹیسوری کی علامہ شہنشاہ حسین نقوی سے ان کی رہائش گاہ پر ملاقات ہوئی جس میں مذہبی ہم آہنگی پر تبادلہ خیال کیا گیا۔

ملاقات میں علامہ شہنشاہ نقوی نے اہل تشیع کو درپیش مشکلات اور حائل رکاوٹوں سے آگاہ کیا۔

اس موقع پر علامہ شہنشاہ حسین نقوی نےکہا کہ رہائش گاہ آمد پر گورنر سندھ کا شکر گذار ہوں، گورنر سندھ کا وژن شاندار ہے اسی انداز میں ملک و قوم کی بہتر خدمت کی جا سکتی ہے۔

ملاقات میں گورنرسندھ کامران خان ٹیسوری نے کہا کہ میرا مقصد محبت اور ہم آہنگی قائم کرنا ہے، ہر مکتبہ فکر اورسیاسی و مذہبی جماعتوں کے رہنماﺅں سے ملاقات کررہا ہوں۔

انہوں نے کہا کہ ملک و قوم کی زیادہ سے زیادہ خدمت کرنا میرا مشن ہے، موجودہ حالات میں اتحاد ، اتفاق اور یکجہتی کی اشد ضرورت ہے۔

گورنرسندھ کا کہنا تھا کہ سب کو جذبات میں ہوش کا دامن نہیں چھوڑنا چاہیے بلکہ سب کو مل کر ملک و قوم کی تعمیر میں حصہ لینا ہوگا۔

کامران خان ٹیسوری کا یہ بھی کہنا تھا کہ مذہبی ہم آہنگی میں علامہ شہنشاہ نقوی کا کردار قابل تحسین ہے، امن و امان کے قیام میں علمائے کرام گراں قدر خدمات انجام دے رہے ہیں۔

گورنرسندھ کامران خان ٹیسوری کا مزید کہنا تھا کہ فلاحی معاشرہ کی تشکیل میں علمائے کرام کا کلیدی کردار ہے۔