کراچی: حیدرآباد تا سکھر موٹروے ایم 6 منصوبے کی کرپشن اسکینڈل سامنے آنے کے بعد وزیراعلیٰ سندھ نے بڑا ایکشن لے لیا ہے۔

تفصیلات کے مطابق ایم 6 موٹروے کرپشن کے معاملے پر وزیراعلیٰ سندھ مراد علی شاہ نے کمشنر بینظیر آباد ڈویژن رشید زرداری اور ڈی سی نوشہرو فیروز شاہزیب شیخ کو تبدیل کردیا ہے۔

گریڈ 20 رشید زرداری کو کمشنر بینظیر آباد ڈویژن کے عہدے سے ہٹا کر علیم لاشاری کو نئے کمشنر بینظیر آباد ڈویژن مقرر کردیا گیا ہے اور گریڈ 18 کے شاہزیب شیخ ڈی سی نوشہرو فیروز تعینات کردیے گئے ہیں۔

خیال رہے کہ ڈی سی نوشہرو فیروز کا عہدہ کئی دن سے خالی تھا۔

واضح رہے کہ ایم 6 موٹروے منصوبے میں ہونے والی کرپشن پر ایف آئی اے اور اینٹی کرپشن کی تحقیقات جاری ہیں، اینٹی کرپشن سندھ نے نیب جیسے اختیارات نہ ہونے کی وجہ سے دو ارب 37 کروڑ کی رقم کی واپسی کیلئے پریشانی کا شکار ہیں۔

اینٹی کرپشن حکام کا کہنا ہے کہ اب تک پرانے قوانین پر کام چل رہا ہے اگر نیب جیسے اختیارات مل جائیں تو رقم کی واپسی کرانے میں بھی آسانی ہوگی۔

یاد رہے کہ ایم 6 منصوبے میں بڑے پیمانے پر کرپشن کا انکشاف ہوا تھا جس کے بعد ڈی سی مٹیاری کو گرفتار کیا گیا تھا جبکہ ڈی سی نوشہرو فیروز تاشفین عالم اس کیس میں مفرور ہیں۔

نیب نے ایم 6 منصوبے کے راستے میں آنے والے سات اضلاع سے تفصیلات طلب کر رکھی ہیں، دوسری جانب ایف آئی اے اور اینٹی کرپشن بھی معاملے کی تحقیقات کر رہے ہیں۔

اس حوالے سے سندھ اسمبلی آڈوٹوریم میں صوبائی وزیر سعید غنی کے ہمراہ پریس کانفرنس سے خطاب کرتے ہوئے مخدوم محبوب زمان کا کہنا تھا کہ مٹیاری کرپشن کیس میں ہمارے خانداں کا نام اچھالا گیا میں احتساب کیلئے تیار ہوں، جب پارٹی نے کہا تو وزارت سے الگ ہو جاؤں گا، میرے دادا نے وزیراعظم اور وزیراعلیٰ شپ کو ٹھکرایا ہے ہم پر لگائے گئے الزامات افسوسناک ہے، ہماری زمین کی خریداری سے کوئی تعلق نہیں ہے۔