پاک انگلینڈ کرکٹ ٹیسٹ میچ کی پیش نظر سیکیورٹی کے سخت انتظامات کئے گئے ہیں جبکہ سی پی او راولپنڈی سید شہزاد ندیم بخاری تمام انتظامات کی فیلڈ میں خود براہ راست نگرانی کر رہے ہیں۔

 سی پی او نے ٹیموں کی آمد سے قبل پوائنٹ ٹو پوائنٹ ڈیوٹیز چیک کیں اور افسران و اہلکاروں کو فول پروف سیکیورٹی یقینی بنانے کے حوالے سے ہدایات دیں ہیں۔

سیکیورٹی کے حوالے سے سی پی اوسید شہزاد ندیم بخاری کا کہنا ہے کہ تمام افسران و اہلکار الرٹ ڈیوٹی کو یقینی بنائیں، مشکوک افراد، اشیاء اور سرگرمیوں پر نظر رکھتے ہوئے انہیں چیک کیا جائے۔

انہوں نے مزید کہا کہ فول پروف سیکیورٹی کو یقینی بنانے کے لئے ہر افسر اور اہلکار کا کردار اہم ہے تاہمکرکٹ ٹیمز، میچز اور شائقین کی فول پروف سیکیورٹی کو یقینی بنایا جائے گا۔

راولپنڈی پولیس کے 5000 سے زائد افسران واہلکار سیکیورٹی فرائض سرانجام دے رہے ہیں  جبکہ ٹریفک کی روانی کو برقرار رکھنے کے لیے ٹریفک پولیس کے 432 افسران واہلکار تعینات کیے گئے ہیں۔

روٹ اور اسٹیڈیم سے ملحقہ عمارتوں پر ماہر نشانہ باز تعینات کیے گئے ہیں اور اسٹیڈیم کے گرد ونواح میں ایلیٹ فورس اورڈولفن فورس کی خصوصی ٹیمیں گشت کررہی ہیں۔

واضح رہے کہ 3 ٹیسٹ میچز کی سیریز آج سے راولپنڈی کرکٹ اسٹیڈیم میں شروع ہورہی ہے جہاں انگلش کپتان بین اسٹوکس نے پاکستانی اسکپر بابر اعظم کو بولنگ کی دعوت دی۔

خیال رہے کہ پاکستان اور انگلینڈ کے درمیان پہلے ٹیسٹ میچ میں مہمان ٹیم نے ٹاس جیت کر پہلے بیٹنگ کا فیصلہ کیا ہے۔

اس سے قبل انگلینڈ کرکٹ بورڈ (ای سی بی) نے پاکستان کرکٹ بورڈ کو پلیئرز کی دستیابی سے آگاہ کردیا تھا، انگلینڈ کے میڈیکل پینل نے کھلاڑیوں کو آج میچ میں شرکت کیلئے کلیئرنس دے دی تھی۔

انگلش بورڈ کا کہنا ہے کہ انگلینڈ ٹیم کے 11 کھلاڑی کھیلنے کی پوزیشن میں ہیں۔