وفاقی وزیر خزانہ اسحاق ڈار نے پاکستان تحریک انصاف کے چیئرمین عمران خان کو مناظرے کا چیلنج کیا ہے۔

تفصیلات کے مطابق وفاقی وزیر اسحاق ڈار نے نیوز کانفرنس کرتے ہوئے کہا کہ آج معیشت کا جو حال ہے اس کا ذمہ دار عمران خان ہے، اس تباہی کی تمام تر ذمہ داری عمران خان پر ہے، وہ جھوٹ بولنے کے ماہر ہیں، انہوں نے تمام اعداد و شمار غلط بتائے، ہم عمران خان کی تباہی کو ٹھیک کرنے کی کوشش کر رہے ہیں۔

اسحاق ڈار نے کہا کہ عمران خان کو ایک چوری شدہ الیکشن کے ذریعے لایا گیا، درست فیصلے لیتے تو پاکستان اس جگہ نہ پہنچتا جس جگہ آپ نے کھڑا کر دیا، ہمارے پاس چوائس تھی ریاست یا سیاست، عدم اعتماد کے وقت لوگ ٹکٹوں کیلئے نواز شریف کے پاس لائنوں میں لگے ہوئے تھے، عمران سمجھتے ہیں ان کی سیاست ہے تو ریاست ہے۔

ان کا کہنا تھا کہ میں عمران خان کو اچھی طرح جانتا ہوں اور وہ بھی مجھے اچھی طرح جانتا ہے، ہمیں جی ڈی پی 4.5 فیصد پر ملی جسے 6.10 پر چھوڑا، ہمیں پہلے سال 244 بلین ڈالر کی معیشت ملی، ہم 5 سال میں 356 بلین ڈالر پر لے کر گئے، ہم نے فی کس آمدنی میں 379 ڈالر کا اضافہ کیا، آپ کے دور حکومت میں فی کس آمدنی میں صرف 30 ڈالر کا اضافہ ہوا، ٹیکسز کی ہماری شرح 9.8 فیصد تھی انہوں نے 9.9 پر چھوڑا۔

انہوں نے کہا کہ عمران خان نے مہنگائی کو کھلا چھوڑ دیا، خان نے عوامی مسائل کی کوئی فکر نہیں کی، ہم 5 سال میں سی پی آئی کو کم کر کے 5.6 فیصد پر لے کر آئے، عمران خان حکومت میں مہنگائی میں پونے 300 فیصد اضافہ ہوا، خان نے پاکستان کے ذمے واجب الادا قرض کی رقم غلط بتائی، انہوں نے جان بوجھ کر ملک کو دنیا کے سامنے بدنام کیا، ہمارا آخری سال کا کرنٹ اکاؤنٹ خسارہ 19.2 ملین ڈالر تھا، خان کے دور میں ریکارڈ قرضے لیے گئے۔

اسحاق ڈار نے کہا کہ عمران خان کرنٹ اکاؤنٹ خسارہ 17.4 ارب روپے پر چھوڑ کر گئے، عمران نے معیشت کے تمام اعشاریوں کا بیڑا غرق کیا، عمران خان نے ملکی قرضوں میں بے پناہ اضافہ کیا۔

وزیر خزانہ اسحاق ڈار نے کہا کہ عمران خان شکر کریں ہم نے سیاست کی بجائے ریاست بچانے کا فیصلہ کیا، ہمارے دور میں پاکستان ترقی کی منازل طے کر رہا تھا، ہم 5 سال میں سی پی آئی کم کر کے 5.6 فیصد پر لے کر آئے، عمران خان اپنے معاشی ماہرین کو لے آئیں، اعداد و شمار پر براہ راست بات کر لیتے ہیں۔

ان کا کہنا تھا کہ عمران خان نے مالی خسارہ بھی بڑھایا، اتحادی حکومت میں شامل جماعتیں اپنی سیاست کی قربانی دے رہی ہیں، عمران خان مہربانی کریں اور جوش خطابت میں جھوٹ نہ بولیں، خان نے گھڑیاں تک بیچ دیں، کیا کام نہیں کیا۔