سابق وزیراعلیٰ پنجاب چوہدری پرویز الٰہی کی جانب سے فواد چوہدری کے متعلق دیئے جانے والے بیان پر معذرت کرلی گئی ہے۔

تفصیلات کے مطابق سابق وزیراعلیٰ پنجاب چوہدری پرویز الٰہی کی جانب سے فواد چوہدری کے بھائی فیصل فرید ایڈوکیٹ کو ٹیلی فون کیا گیا ہے۔

دوران گفتگو پرویز الٰہی نے کہا ہے کہ فواد چوہدری اور انکے خاندان سے برسوں پر محیط نہایت احترام و عقیدت کا رشتہ ہے، کل کے نادانستہ بیان سے فواد چوہدری اور اہلِ خانہ کے جذبات مجروح ہوئے، جس پر افسوس ہے۔

انہوں نے کہا کہ فواد چوہدری کی گرفتاری و جھوٹے پرچے کا اندراج نری سفاکیت، نہایت قابلِ مذمت ہے اور اپنے بیان پر معذرت خواہ ہوں، فواد چوہدی اور اہلِ خانہ سے مکمل یکجہتی کا اظہار کرتا ہوں۔

اس موقع پر فیصل فرید ایڈووکیٹ  کا کہنا تھا کہ چوہدری صاحب معذرت کرنا آپ کا بڑا پن ہے، آپ ہمیں شرمندہ کررہے ہیں۔

انہوں نے کہا کہ چوہدری صاحب آپ بڑے ہیں، میں اور میرا خاندان آپ کو اپنا بزرگ سمجھتے اور نہایت احترام کی نگاہ سے دیکھتے ہیں، ہم بطور خاندان آپ اور آپ کے اہلِ خانہ کی دائم سلامتی کیلئے دعاگو ہیں۔