کراچی اور حیدرآباد میں بلدیاتی الیکشن کے دوران سیکیورٹی کے خدشات کی پیش نظر وزارت داخلہ نے انتہائی حساس پولنگ اسٹیشنز پر رینجرز کی تعیناتی کی یقین دہانی کرادی ہے۔

تفصیلات کے مطابق وزارت داخلہ نے 500 پولنگ سٹیشنز پر رینجرز کی اسٹیٹک ڈیوٹی کی یقین دہانی کرادی  ہے جس کے بعد الیکشن کمیشن کی جانب سے 500 انتہائی حساس پولنگ اسٹیشنز کی فہرست تیار کرلی گئی ہے۔

الیکشن کمیشن کی جانب سے 500 انتہائی حساس پولنگ اسٹیشنز کی فہرست وزارت داخلہ کو بھجوا دی گئی جس میں 5 ہزار رینجرز اہلکاروں کی اسٹیٹک ڈیوٹی کی درخواست کی گئی ہے۔

یہ بھی پڑھیں: بلدیاتی الیکشن، وزارت داخلہ کی فوج اور رینجرز کی تعیناتی سے معذرت

خیال رہے کہ وزارت داخلہ کی منظوری کے بعد رینجرز اہلکاروں کی تعیناتی کی جائے گی تاہم الیکشن کمیشن کی جانب سے آج شام سے رینجرز اہلکاروں کو تعینات کرنے کی درخواست کی گئی ہے۔

واضح رہے کہ پولنگ اسٹیشنز پر پولیس اور ایف سی اہلکار بھی تعینات کیے جائیں گے تاہم پاک فوج اور رینجرز اہلکار کوئیک ریسپانس فورس کے طور پر الرٹ رہیں گے۔

مرکزی کنٹرول روم نے کام شروع کردیا

اسلام آباد الیکشن کمیشن سیکریٹریٹ میں قائم مرکزی کنٹرول روم نے کام شروع کردیا ہے جو کہ 3 روز کیلئے قائم کیا گیا ہے۔

مرکزی کنٹرول انتخابات کے نتائج آنے تک بلا تعطل کام جاری رکھے گا اور  شکایات کی صورت میں فوری احکامات جاری کرے گا۔

یہ بھی پڑھیں: سیکیورٹی خدشات، سندھ حکومت کا بلدیاتی انتخابات ملتوی کرنے کا مطالبہ

مرکزی کنٹرول روم اسلام آباد سے سینئر افسران انتخابی عمل کی مانیٹرنگ کریں گے جبکہ سیکریٹری الیکشن کمیشن اور اسپیشل سیکرٹری الیکشن کمیشن، کراچی میں صوبائی الیکشن کمیشن سندھ کے دفتر سے انتخابی عمل کی نگرانی کر رہے ہیں۔

اس حوالے سے الیکشن کمیشن کا کہنا ہے کہ پولنگ کے دوران کسی قسم مداخلت کو برداشت نہیں کیا جائے گا  اور خلاف ورزی کرنے والوں کو خلاف فوری ایکشن لیا جائے گا۔