جماعت اسلامی کے امیر حافظ نعیم الرحمان کا کہنا ہے کہ مینڈیٹ کے تحفظ کے بغیر بات چیت ممکن نہیں۔

امیر جماعت اسلامی کراچی حافظ نعیم الرحمان نے میڈیا سے گفتگو کرتے ہوئے کہا کہ الیکشن کمیشن کے پاس ہماری پوری فائلیں موجود ہیں، یہ نہیں کہا جاسکتاچھوڑیں اور آگے بڑھیں۔

چند یوسیز کا نہیں کراچی کے مستقبل کا معاملہ ہے

انہوں نے کہا کہ بلدیاتی انتخابات آخری وقت تک ملتوی کرانے کی کوشش کی گئی، کراچی کے عوام نے بھرپور طریقے سے ووٹ کاسٹ کیا۔

حافظ نعیم الرحمان نے کہا کہ کراچی بلدیاتی انتخابات میں لیول پلیئنگ فیلڈ نہیں تھی، چند یوسیز کا نہیں کراچی کے مستقبل کا معاملہ ہے۔

امیر جماعت اسلامی نے کہا کہ ایم کیو ایم کی پوری کوشش تھی انتخابات نہ ہوں، بلدیاتی انتخابات کرانے پر الیکشن کمیشن کو سراہتے ہیں۔

شہر پر توجہ دی گئی ہوتی تو ملک معاشی مسائل کا شکار نہ ہوتا

انہوں نے کہا کہ کراچی کیلئے 1100ارب پیکج کا اعلان ہوا مگر عمل نہیں ہوا، گرین لائن، ریڈ لائن سمیت ہر منصوبے میں کرپشن ہورہی ہے۔

مزید پڑھیں: کراچی میں کسی کی بدمعاشی نہیں چلنے دیں گے، حافظ نعیم الرحمان

جماعت اسلامی امیر کا کہنا ہے کہ کراچی دشمنی حقیقت سندھ اور پاکستان سے دشمنی ہے، شہر پر توجہ دی گئی ہوتی تو ملک معاشی مسائل کا شکار نہ ہوتا۔

حافظ نعیم الرحمان نے دعویٰ کیا کہ ماضی کی طرح نئی مردم شماری میں بھی جعلسازی کے منصوبے بن رہے ہیں۔

اس سے قبل انہوں نے اپنے ایک بیان میں کہا تھا کہ معیشت کی بہتری کے لیے طویل اور قلیل مدتی پالیسی بنانا ہوگی، بڑی حکومتی اور اپوزیشن جماعتوں کا رویہ غیر سنجیدہ ہے۔

یہ بھی پڑھیں: کوئی جماعت کراچی کو اپنا گھر نہیں سمجھتی، حافظ نعیم الرحمان

حافظ نعیم الرحمان نے کہا تھا کہ قومی سلامتی معیشت سے جڑی ہے، معیشت اور سیکیورٹی پر کوئی بیٹھنے کو تیار نہیں ہوتا۔