پاکستان تحریک انصاف کے رہنما فواد چوہدری نے کہا ہے کہ نیا چیئرمین نیب راجا ریاض کی مشاورت سے لگایا گیا تو مسترد کردیں گے۔

سابق وفاقی وزیر فواد چوہدری نے اسلام آباد میں میڈیا سے گفتگو کرتے ہوئے کہا کہ اپوزیشن لیڈر پی ٹی آئی کا ہونا چاہیے، نئے اپوزیشن لیڈر کے تقرر کے بعد چیئرمین نیب تعینات کریں۔

راجا ریاض اپوزیشن لیڈر نہیں، لوٹے ہیں

انہوں نے کہا کہ نیا چیئرمین نیب راجا ریاض کی مشاورت سے نہ لگایا جائے، راجا ریاض اپوزیشن لیڈر نہیں، لوٹے ہیں، انکی مشاورت سے چیئرمین تعینات کیا تو مسترد کردینگے۔

فواد چوہدری نے کہا کہ چیئرمین نیب کا استعفیٰ گھر کا بھیدی لنکا ڈھائے کے مترادف ہے، مریم نواز نے بلیک میلنگ کیلئے سیل قائم کیا ہے، چیئرمین نیب پر کیسز کیلئے دباؤ ڈالا جارہا تھا، عمران خان کے خلاف درج مقدمات پر ہنسی آتی ہے، عمران خان کو جو عدالت بلائے گی پیش ہوں گے۔

سپریم کورٹ ججز کے خلاف پروپیگنڈے پر نوٹس لیں

انکا کہنا ہے کہ ن لیگ ججز کی تقسیم پر پروپیگنڈا کررہی ہے، سپریم کورٹ ججز کے خلاف پروپیگنڈے پر نوٹس لیں، سپریم کورٹ ن لیگ کے پروپیگنڈے کا جواب دے۔

انہوں نے کہا کہ عدالتی نظام مضبوط دیکھنا چاہتے ہیں، عدلیہ کے خلاف منظم مہم چلائی جارہی ہے، عدلیہ کے خلاف مہم کی مذمت کرتے ہیں، اس مہم پر پی ٹی آئی بھرپور مخالفت کرے گی، عدلیہ کےعلاوہ کسی سے امید نہیں ہے۔

محسن نقوی آنکھوں میں آنکھیں ڈال کر کہیں نیوٹرل ہوں

سابق وفاقی وزیر نے کہا کہ کل قومی اسمبلی سےآئی ایم ایف بجٹ پاس ہوا، 61 ارکان نے170 ارب کے ٹیکس کی منظوری دی، منی بجٹ کی منظوری کیلئے کورم مکمل نہیں تھا، 61ارکان نےمنی بجٹ منظورکیا، 61ارکان ولن ہیں،تصاویرجاری کریں گے۔

انہوں نے کہا کہ نگران حکومت کے آنے کے بعد 700 تبادلے ہوئے، پیسے لے کر تقررو تبادلے کیے گئے، نگراں کابینہ میں بہت سے لوگ پیسے دے کر شامل ہوئے۔

انکا کہنا ہے کہ محسن نقوی نے تقرری کے دوران لندن کے 7دورے کیے، محسن نقوی آنکھوں میں آنکھیں ڈال کر کہیں نیوٹرل ہوں۔

فواد چوہدری نے مزید کہا کہ چیف الیکشن کمشنر کو صدر کا عہدہ دینے کی پیشکش کی گئی، چیف الیکشن کمشنر کو صدارتی آرڈر پر عمل نہ کرنے کا کہا گیا، چیف الیکشن کمشنر بھی اب استعفیٰ دیں، اسپیکر کو منشی نہ بنائیں یہ بڑاعہدہ ہے۔

اعجاز چوہدری کی گفتگو

دوسری جانب رہنما پاکستان تحریک انصاف اعجاز چوہدری نے بھی میڈیا سے گفتگو کرتے ہوئے کہا کہ صدر مملکت نے الیکشن کی تاریخ کا اعلان کردیا، آئین کے ساتھ کھلواڑ پر سب خاموش ہیں۔

انہوں نے کہا کہ گزشتہ روز لاہور نے زندہ دلی کا ثبوت دیا، نگراں حکومت پنجاب پی ڈی ایم کا بغل بچہ ہے، نگراں حکومت نے دفعہ 144نافذ کردی۔

پی ٹی آئی رہنما نے کہا کہ آئین پرامن احتجاج کا حق دیتا ہے، مال روڈ پر کل کے مظاہرے میں ہزاروں لوگ ہونگے۔

اعجاز چوہدری نے مزید کہا کہ ہر ضلع سے5 رہنما کارکنوں کے ساتھ جیل جائیں گے، 200ارکان نے رضاکارانہ گرفتاری کیلئے خود کو پیش کیا۔