اسلام آباد: صدر مملکت ڈاکٹر عارف علوی کی جانب سے چیف الیکشن کمشنر سکندر سلطان راجہ کو ایک بار پھر خط لکھا گیا ہے جس میں انکو انتخابات سے متعلق ہنگامی اجلاس کی دعوت دی گئی ہے۔

خط کے متن کے مطابق صدر مملکت نے سکندر سلطان راجہ کو 20 فروری 2023 کو ایوان صدر میں سیکشن 57 ایک کے تحت الیکشنز کے حوالے سے مشاورت کے لیے دعوت دی۔

خط میں صدر مملکت نے کہا کہ ایکٹ کے تحت صدر مملکت عام انتخابات کی تاریخ یا تاریخوں کا اعلان کمیشن سے مشاورت کے بعد کریں گے، اس معاملے پر لاہور ہائی کورٹ کے فیصلے اور سپریم کورٹ کے حالیہ مشاہدات جیسی کچھ اہم پیش رفت ہوئی۔

صدر کا الیکشن کمیشن کی بے حسی پر ناراضگی کا اظہار

خط میں صدر مملکت عارف علوی نے الیکشن کمیشن کی جانب سے بے حسی پر ناراضگی کا بھی اظہار کیا ہے۔

صدر مملکت نے کہا کہ الیکشن کمیشن نے ابھی تک پہلے خط کا جواب نہیں دیا، میں بے چینی سے انتظار کر رہا تھا کہ کمیشن اپنے آئینی فرائض کا احساس کرے گا اور اس کے مطابق کام کرے گا۔

عارف علوی نے مزید کہا کہ اہم معاملے پر الیکشن کمیشن کے افسوسناک رویے سے انتہائی مایوسی ہوئی۔ آئین کے تحفظ اور دفاع کی اپنی آئینی ذمہ داری کا احساس کرتے ہوئے چیف الیکشن کمشنر کو اپنے دفتر میں الیکشن پر مشاورت کیلئے ہنگامی ملاقات کیلئے مدعو کرتا ہوں۔

واضح رہے کہ 8 فروری کو بھی صدر مملکت ڈاکٹر عارف علوی کی جانب سے انتخابات کی تاریخ کے معاملے پر چیف الیکشن کمشنر کو خط لکھا گیا تھا۔

صدر مملکت کی جانب سے چیف الیکشن کمشنر پر انتخابات کی تاریخ کا فوری اعلان کرنے پر زور دیا گیا تھا۔

خط میں صدر مملکت کا کہنا تھا کہ آئین تاخیر کی اجازت نہیں دیتا ہے تاہم انتخابات کی تاریخ کا فوری اعلان کریں۔

انہوں نے کہا تھا کہ الیکشن کمیشن الیکشن ایکٹ 2017ء کے مطابق صوبائی اسمبلیوں کے انتخابات کی تاریخ کا فوری اعلان کرے اور پنجاب اور خیبر پختونخوا کی صوبائی اسمبلیوں کے لیے انتخابی شیڈول جاری کرے۔