گورنر سندھ نے سرمایہ کاروں کو مدعو کرتےہوئے کہا ہے کہ کراچی میں مختلف شعبوں میں سرمایہ کاری کے سازگار مواقع موجود ہیں۔

تفصیلات کے مطابق گورنر سندھ کامران خان ٹیسوری کی اسلام آباد میں مراکش کے سفیر محمد کارمون سے ملاقات ہوئی ہے۔

ملاقات کے دوران باہمی تجارت کے مزید فروغ، وفود کے تبادلوں، تعلیم و صحت کے شعبوں میں تعاون میں اضافے سمیت صوبہ سندھ میں سرمایہ کاری کے مواقعوں اور دیگر امور پر تبادلہ خیال کیا گیا ہے۔

اس موقع پر گورنر سندھ کا کہنا تھا کہ مراکش اسلامی تاریخ میں نمایاں اہمیت کا حامل ملک ہے، اپنی تعمیرات کے لحاظ سے منفرد اہمیت رکھتا ہے۔

ان کا کہنا تھا کہ پاک مراکش برادرانہ تعلقات کئی دہائیوں پر محیط ہیں اور باہمی تعاون میں اضافہ سے دونوں ممالک کی معیشت کو فائدہ اٹھا سکتی ہیں۔

انہوں نے بتایا کہ ملک کے معاشی مرکز کراچی میں مختلف شعبوں میں سرمایہ کاری کے سازگار مواقع موجود ہیں۔

اس موقع پر مراکش سفیر کا کہنا تھا کہ مراکش کے سرمایہ کار مختلف شعبوں میں سرمایہ کاری میں دلچسپی رکھتے ہیں اور پاکستان کے عوام نے ہمیشہ مراکش کی حمایت کی ہے۔

دوسری جانب گورنر سندھ کامران ٹیسوری نے اسلام آباد میں صدر مملکت ڈاکٹر عارف علوی سے ملاقات کی جس کے دوران صوبے کو درپیش مسائل پر گفتگو ہوئی۔

 ملاقات کے دوران ملک کی مجموعی سیاسی صورتحال، صوبہ کو درپیش مسائل، سیلاب متاثرین کی بحالی کے اقدامات پر بات چیت ہوئی۔

ملاقات میں شہر قائد کے ترقیاتی منصوبوں اور اس کے انفرا اسٹرکچر کی تعمیر نو پر بھی تبادلہ خیال ہوا۔

کامران خان ٹیسوری کا اس موقع پر کہنا تھا کہ صوبہ سندھ کی تعمیر و ترقی میں وفاق کا تعاون اہم ہے۔