وزیر اعلیٰ سندھ سید مراد علی شاہ نے کہا ہے کہ اس سال صوبے میں گندم کی بہترین پیداوار ہوئی ہے۔

تفصیلات کے مطابق وزیر اعلیٰ سندھ سید مراد علی شاہ سے ورلڈ بینک کے ڈائریکٹر ساؤتھ ایشیا مسٹر جان اے رومورلڈ کی سربراہی میں بینک کے اعلیٰ سطحی وفد نے ملاقات کی۔

اجلاس میں مختلف منصوبوں کی پیش رفت پر تبادلہ خیال کیا گیا۔

ورلڈ بینک کا اس موقع پر کہنا تھا کہ پاکستان میں موسمی تبدیلیوں کے باعث 2022 میں تباہ کن بارشیں اور سیلاب آئے، ملک کا 3/1 حصہ پانی میں ڈوب گیا، 1700 لوگ جاں بحق ہو گئے، 33 ملین لوگ متاثر ہوئے اور 16 بلین ڈالرز کا نقصان ہوا۔

ورلڈ بینک کے مطابق سیلاب کے بعد اب ہیٹ ویوز جیسے خطرات بھی ہو سکتے ہیں، پاکستان میں سیلاب کی وجہ سے 8.4 سے 9.1 ملین لوگ مزید غربت کے شکار ہوں گے، ملک میں سیلاب متاثر علاقوں میں تعمیرنو شروع کی جائے، زراعت کے شعبے پر خصوصی توجہ دے کر بحال کیا جائے، ملک میں جدید زراعت کے طریقے اور زراعت پانی کی نکاسی کا نظام لانا ہو گا۔

وزیر اعلیٰ سندھ سید مراد علی شاہ نے اس موقع پر کہا کہ سندھ میں زراعت کی بحالی کے لیے اقدامات کیے گئے ہیں، ہاریوں کو گندم کے بیج کیلئے ورلڈ بینک کی مدد سے مالی مدد کی گئی ہے، زرعی زمینوں سے پانی کی نکاسی کر کے خریف کا فصل اگایا ہے، اس سال سندھ میں گندم کی بہترین فصل ہوئی ہے، سندھ حکومت نے گندم کی سپورٹ پرائس 4000 روپے فی من مقرر کی ہے۔

مراد علی شاہ نے مزید کہا کہ گندم کی اچھی فصل اور کاشتکاروں کو اچھی قیمت ملنے سے ان کی بحالی ہو سکے گی۔

وزیر اعلیٰ سندھ کے ساتھ صوبائی وزرا، مشیر، چیف سیکریٹری، چیئرمین پی اینڈ ڈی اور متعلقہ سیکریٹریز شریک تھے۔

ضرور پڑھیں؛ سندھ میں گزشتہ 33 ماہ سے پولیو کا کوئی کیس رپورٹ نہیں ہوا، وزیر اعلیٰ سندھ