پیپلز پارٹی کے سینئر رہنما میاں رضا ربانی نے کسی بھی جواز پر عام انتخابات کے التوا کو ملک کے لئے تباہ کن قرار دے دیا۔

سابق چیئرمین سینیٹ رضا ربانی نے معیشت، سیکیورٹی یا دہشت گردی کی آڑ میں نگران حکومت کی توسیع کی مخالفت کردی اور کہا کہ عام انتخابات آئین کے تحت اسمبلی کی مدت کی تکمیل یا تحلیل پر 60 یا 90 روز میں ہو جانے چاہئیں۔

رضا ربانی نے اپنے جاری کردہ بیان میں کہا کہ معیشت، سیکیورٹی یا دہشت گردی کے نام پر نگران حکومتوں کی مدت میں توسیع کے جمہوری نظام، آئین اور وفاق پر تباہ کن اثرات ہوں گے۔

پیپلز پارٹی کے سینئر رہنما نے جمیعت علمائے اسلام کے ورکرز کنونشن پر خود کش حملے کی شدید مذمت کرتے ہوئے کہا کہ عام انتخابات کے قریب آتے ہی ایک سیاسی جماعت کو دہشت گردی کا نشانہ بنایا گیا، اس قسم کے دہشت گرد حملوں سے جمہوری عمل کو ڈی ریل نہیں کیا جا سکتا۔

سابق چیئرمین سینیٹ رضا ربانی نے مزید کہا کہ گزشتہ عام انتخابات میں بھی پیپلز پارٹی اور عوامی نیشنل پارٹی کو دہشت گردی کا نشانہ بنایا گیا تھا۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/pakistan/2023/07/193670/amp/ کو لائک کریں