وزیر اعظم شہباز شریف نے کہا ہے کہ آئی ایم ایف کی مدد سے معیشت کی کایا پلٹ دیں گے۔

تفصیلات کے مطابق وزیر اعظم شہباز شریف نے ایم ڈی آئی ایم ایف کرسٹلینا جورجیوا سے سے ٹیلی فونک رابطہ کیا جس میں ایم ڈی آئی ایم ایف نے وزیراعظم سے گفتگو میں ماضی کی پیدا کردہ بداعتمادی کا ذکر کیا۔

ایم ڈی آئی ایم ایف نے وزیر اعظم سے گفتگو کرتے ہوئے کہا کہ آئی ایم ایف کو ماضی کی پیدا کردہ بداعتمادی کی وجہ سے تحفظات تھے، مجھے یقین ہے کہ وزیر اعظم شہباز شریف وعدوں کو پورا کریں گے، وزیراعظم نے پیرس میں ملاقات میں معاہدہ پورا کرنے کی دانش مندی اور عزم دکھایا، شہباز شریف نے جو لیڈرشپ دکھائی، وہ لائق تحسین اور قابل تعریف ہے۔

ان کا کہنا تھا کہ اسی وجہ سے آپ کی مدد کریں گے، پاکستان اور آئی ایم ایف کے درمیان اب مضبوط شراکت داری اور باہمی اعتماد استوار ہو چکا ہے، پاکستان آئی ایم ایف کا اہم رکن ہے، آئی ایم ایف پاکستان کی ہر ممکن حد تک مدد کرتا رہے گا۔

ایم ڈی آئی ایم ایف نے وزیر اعظم سے قریبی رابطے میں رہنے کی خواہش کا اظہار کیا۔

وزیراعظم نے ایم ڈی آئی ایم ایف سے گفتگو کرتے ہوئے کہا کہ آپ کے قیمتی الفاظ پر آپ کا بے حد شکریہ ادا کرتا ہوں، آپ نے بڑی راست گوئی اور مثبت انداز سے پیرس میں ملاقات میں گفتگو کی تھی، آج صبح بھی اپنی معاشی ٹیم سے ملاقات کر کے واضح کیا کہ معاہدے کی زرا سی خلاف ورزی بھی برداشت نہیں کروں گا، 12 اگست تک ہماری حکومت ہے، پھر نگران حکومت آجائے گی، نگران حکومت معاہدے کا احترام جاری رکھے گی۔

وزیراعظم نے کہا کہ الیکشن کے بعد عوام نے اگر ہمیں منتخب کیا تو آئی ایم ایف کی مدد سے معیشت کو ٹرن آراﺅنڈ کر دیں گے، پاکستان دنیا کے بہترین اور لذیذ ترین آم پیدا کرتا ہے، آپ کے لیے احترام کے جذبے کے طور پر آموں کا تحفہ بھجوا رہا ہوں۔

انہوں نے ایم ڈی آئی ایم ایف کے غریب عوام کے لیے جذبے اور احساس کو سراہتے ہوئے کہا کہ آپ نے جس طرح پاکستان کی مدد کی ہے، اس کا شکریہ ادا کرنے کے لیے الفاظ نہیں۔

ایم ڈی آئی ایم ایف سے پیرس میں ملاقات کے بعد وزیراعظم شہباز شریف نے وزیر خزانہ کو آگاہ کیا تھا۔