سابق وزیراعظم پاکستان شہبازشریف نے ترکیہ کے دارالحکومت انقرہ میں دہشت گردحملے کی شدید مذمت کی ہے۔

شہبا ز شریف نے کہاکہ ترکیہ کی حکومت اور عوام کے ساتھ یک جہتی کا اظہار کرتے ہیں، اللہ پاک کا شکر ہے کہ کوئی بڑاجانی نقصان نہیں ہوا۔

انہوں نے کہاکہ دہشت گرد انسانیت کے مشترکہ دشمن ہیں، دہشت گردوں کے ہینڈلرز اور فنانسرز کے خلاف پوری دنیا کو مل کرفیصلہ کن اقدام کرنا ہوگا۔

سابق وزیراعظم نے کہاکہ اقوام متحدہ اور سلامتی کونسل دہشت گردی کے تدارک اور ان کے ہینڈلرز کے خلاف کارروائی پر غور کرے، بین الاقوامی تحقیقات کی ضرورت ہے کہ دہشت گردی کے واقعات کے پیچھے کون ہے۔

شہباز شریف نے کہاکہ او آئی سی کے پلیٹ فارم سے اسلامی دنیا کو اس عفریت کے خلاف مشترکہ حکمت عملی مرتب کرنے کی ضرورت ہے، دہشت گردی اور خود کش حملوں میں ایک خاص پیٹرن نظر آرہا ہے۔

شہبازشریف نے زخمی پولیس اہلکاروں سے اظہار ہمدردی اور جلد صحت یابی کی دعا کی۔

واضح رہےکہ ترکیہ کے دارالحکومت انقرہ میں وزارت داخلہ کے دفتر کے باہر دھماکا ہوا اور فائرنگ کی آوازیں سنائی دیں۔

دھماکے کے نتیجے میں 2 پولیس اہلکار زخمی ہوئے ہیں جنہیں اسپتال منتقل کر کے طبی امداد دی جارہی ہے۔

رپورٹس میں بتایا گیا کہ دھماکے کے فوراً بعد پولیس کی بھاری نفری جائے وقوعہ پر پہنچ گئی ہے جبکہ ابتدائی اطلاعات کے مطابق 2 دہشتگردوں نے وزارت داخلہ کی عمارت کے باہر دھماکا کیا، دونوں دہشت گرد گاڑی میں آئے تھے۔

ترکیہ حکام کا کہنا ہے کہ ایک دہشتگرد نے خود کو عمارت کے گیٹ پر دھماکے سے اڑایا جبکہ دوسرے دہشتگرد کو ہلاک کردیا گیا ہے۔