آفیشل سیکریٹ ایکٹ کی خصوصی عدالت نے سائفر کیس کی کارروائی پرنٹ، الیکٹرانک اور سوشل میڈیا پر نشر کرنے پر مکمل پابندی عائد کردی۔

تفصیلات کے مطابق خصوصی عدالت کی جانب سے جاری ہونے والے فیصلے میں کہا گیا ہے کہ پرنٹ، الیکٹرونک اور سوشل میڈیا پر کوئی کارروائی نشر نہیں ہوگی، پیمرا اور پی ٹی اے کو اس حوالے سے ہدایات پر پابندی کی ہدایت کی جاتی ہے۔

عدالتی فیصلے میں لکھا گیا ہے کہ اگر کوئی بھی خلاف ورزی ہوئی تو اس پر آفیشل سیکریٹ ایکٹ کے تحت کارروائی ہوگی، پیمرا اور پی ٹی اے کو عدالتی حکم کی کاپی فراہم کی جائے تاکہ آئندہ خلاف ورزی نہ ہو۔

فیصلے میں عدالت نے لکھا کہ سائفر کیس کا ٹرائل ان کیمرہ کرنے کی پراسیکیوشن کی درخواست منظور کی جاتی ہے جبکہ سابق چیئرمین پی ٹی آئی اور شاہ محمود قریشی کی فیملی مشروط موجود ہوگی اور شرط ہوگی کہ عدالتی کاروائی کو فیملی ممبران کسی جگہ بیان نہیں کریں گے۔

تحریری حکم نامے میں کہا گیا ہے کہ ٹرائل کی کاروائی کے دوران عدالت میں پبلک موجود نہیں ہوگی۔

سائفر کیس؛ شاہ محمود قریشی کی درخواست ضمانت بھی سماعت کیلئے مقرر

سائفر کیس میں شاہ محمود قریشی کی درخواست ضمانت بھی سماعت کیلئے مقرر کردی گئی ہے،جسٹس سردار طارق مسعود کی سربراہی میں تین رکنی بنچ 22دسمبر کو سماعت کرے گا۔

یاد رہے کہ شاہ محمود قریشی نے سائفر کیس میں درخواست ضمانت دائر کر رکھی ہے۔