سابق چیئرمین پی ٹی آئی نے بشریٰ بی بی کو نکاح سے پہلے نہ دیکھنے کا دعویٰ کیا جس کے بعد استحکام پاکستان پارٹی (آئی پی پی) کے رہنما اور سابق وفاقی وزیر عون چوہدری نے سابق چیئرمین پی ٹی آئی کے اس دعوے کو صدی کا سب سے بڑا جھوٹ قرار دے دیا۔

تفصیلات کے مطابق استحکام پاکستان پارٹی (آئی پی پی) کے رہنما اور سابق وفاقی وزیر عون چوہدری نے سابق چیئرمین پی ٹی آئی کے بشریٰ بی بی کو نکاح سے پہلے نہ دیکھنے کے بیان پر ردعمل دیتے ہوئے کہا کہ بشریٰ بی بی کو نکاح سے پہلے نہ دیکھنے کا دعویٰ اس صدی کا سب سے بڑا جھوٹ ہے، قوم کا خود لیڈر بولنے والا جھوٹ بولے تو میرا فرض ہے کہ سچ سامنے لاؤں۔

عون چوہدری نے کہا کہ سابق چیئرمین پی ٹی آئی کے پول کھولے تو انہیں شرم سے  سرچھپانے کی جگہ نہیں ملے گی، سابق چیئرمین پی ٹی آئی بشریٰ بی بی سے نکا ح سے پہلے درجنوں بارے ملے بھی اور دیکھا بھی۔

انہوں نے کہا کہ بشریٰ بی بی قران پر حلف دیدیں کہ انہوں نے سابق چیئرمین پی ٹی آئی کو نکاح سے پہلے چہرہ نہیں دکھایا، میں خود سابق چیئرمین پی ٹی آئی کو ملاقات کے لئے  لے کر جاتا رہا، سابق چیئرمین پی ٹی آئی جھوٹ میں کتنا گریں گے کہ قرآن اٹھانے تک پہنچ گئے۔

عون چوہدری نے کہا کہ سابق تعلق کا لحاظ رکھ رہا ہوں ورنہ ایسے راز کھولوں کہ سابق چیئرمین پی ٹی آئی کا گند دنیا کے سامنے آجائے، سابق چیئرمین بشری بی بی کو ایک بار نہیں کئی بار نکاح سے پہلے ملے، گھنٹوں ملاقات کرتے رہے۔

انہوں نے کہا کہ سابق چیئرمین پی ٹی آئی کی سیاست جھوٹ پر مبنی ہے اللہ کا شکر ہے کہ ان کو وقت پر ہی چھوڑ دیا۔

ان کا کہنا تھا کہ نئے چیئرمین پی ٹی آئی کے لئے بیرسٹر گوہر علی کی نامزدگی بھی ان کے اندر کے خوف کی عکاس ہے، سابق چیئرمین پی ٹی آئی پارٹی کے کسی اہل شخص کو پارٹی میں مقام دینا ہی نہیں چاہتے، ملک میں شر پھیلانے اوراداروں سے تصادم کرنے والے کے خلاف آواز بلند کرنا ملک سے وفا کے مترادف ہے۔

واضح رہے کہ آج اڈیالہ جیل راولپنڈی میں سائفر کیس سے متعلق سماعت کے دوران سابق چیئرمین پی ٹی آئی نے ایک سوال کے جواب میں بتایا کہ بشرٰی بی بی سے متعلق جھوٹے الزامات لگائے گئے، بشریٰ بی بی کے سابق خاوند کےذریعے جھوٹے الزامات لگائے گئے،  بشریٰ بی بی کے سابق شوہرکو ٹی وی پروگرامزمیں بٹھا کر مختلف قسم کی باتیں کروائی گئیں، قسم اٹھانے اور قرآن پرہاتھ رکھنے کے لیےتیارہوں، بشریٰ بی بی کو اس دن دیکھا جب میرا نکاح ہوا۔