لاہور: وزیر اطلاعات پنجاب عظمی بخاری نے کہا ہے کہ ہم سے مقابلہ کرنا ہے تو کارکردگی میں کریں گالم گلوچ اور الزامات کی سیاست ہمیں نہیں آتی۔

صوبائی وزیر پنجاب عظمی بخاری نے برسٹر سیف کے بیان پر رد عمل دیتے ہوئے کہا کہ برسٹر صاحب مجھے لگتا ہے آپ کو صرف پنجاب کی نوکری کرنی ہے، آج تک بتایا تو نہیں خیبر پختونخوا میں کیا کارنامے سر انجام دینے ہیں۔

انہوں نے کہا کہ مریم نواز نے 30 دنوں میں عوامی فلاح کے 30 پروجیکٹس دیے ہیں اور علی امین گنڈاپور نے 30 دنوں میں ایک بھی عوامی فلاح کا پروجیکٹ متعارف نہیں کروایا، ہم سے مقابلہ کرنا ہے تو کارکردگی میں کریں گالم گلوچ اور الزامات کی سیاست ہمیں نہیں آتی یہ سب آپ کو مبارک ہو۔

عظمی بخاری نے کہا کہ جتنی فکر آپ کو مریم نواز کی ہے کاش اتنی فکر پختونخوا کے عوام کی ہوتی، ابھی کل ہی خیبر پختونخوا میں بارشوں کے باعث سات افراد جان بحق ہو گئے جن میں تین کمسن بچے بھی شامل ہیں۔

انکا کہنا تھا کہ خدا کا خوف کریں خیبر پختونخوا کے عوام کے حال پر رحم کھائیں، اگر آپ لوگ بدقسمتی سے پختونخوا پر مسلط ہو گئے ہیں تو یہاں کے لوگوں کے لیے آسانیاں پیدا کرے۔

وزیر اطلاعات پنجاب نے کہا کہ مالاکنڈ ڈویژن، لوئر دیر، اپر دیر، بنوں اور ڈیرہ اسماعیل خان میں عوام آپ کو بد دعائیں دے رہے ہیں، جس صوبے میں 10 افراد بارشوں سے جاں بحق ہو جائے اس صوبے کے ترجمان کو مریم نواز کی فکر پڑی ہے۔

عظمی بخاری نے مزید کہا کہ پہلے 35 پنکچر پھر 4 حلقے اب فارم 45 تانگہ پارٹی کا ورد بن چکا ہے، آپ کی قسمت میں رونا دھونا لکھا ہے یہی آپ کا مقدر ہے۔