اسلام آباد: انٹرنیشنل مانیٹری فنڈز (آئی ایم ایف) مشن کی پاور ڈویژن حکام سے ملاقات کے دوران نئے مطالبات سامنے آگئے ہیں۔

ذرائع کے مطابق آئی ایم ایف مشن اور پاور ڈویژن حکام کے درمیان ملاقات ہوئی جس میں پاور ڈویژن حکام نے سیکٹر میں جاری اصلاحات سے متعلق بریفنگ دی۔

ملاقات کے دوران پاور سیکٹر کے گردشی قرض کی روک تھام کیلئے اقدامات پر بھی بات چیت کی گئی اور آئی ایم ایف مشن کے ساتھ آئندہ مالی سال کیلئے سبسڈیز کا معاملہ بھی زیر بحث آیا۔

ذرائع نے بتایا کہ ملاقات میں بجلی کے بنیادی ٹیرف سمیت سیکٹر کے نقصانات سے متعلق امور پر بھی گفتگو کی گئی، تاہم اس دوران آئی ایم ایف مشن نے سیکٹر کے نقصانات کیلئے کمی کے اقدامات پر اطمینان کا اظہار کیا۔

ذرائع کا کہنا تھا کہ آئی ایم ایف نے گردشی قرض کی روک تھام کیلئے مزید اقدامات پر زور دیا اور بجلی چوری کی روک تھام کیلئے اقدامات کا اعتراف کیا۔

اس موقع پر آئی ایم ایف کی جانب سے سیکٹر میں فوری اصلاحات اور جدید ٹیکنالوجی کے استعمال کا بھی مطالبہ کیا گیا۔

ذرائع کے مطابق ملاقات میں ڈسکوز کی نجکاری کے حوالے سے بھی پاور ڈویژن حکام نے آئی ایم ایف کو بریفنگ دی اور آئندہ مالی سال کیلئے پاور سیکٹر سے متعلق حکومتی پالسیز پر بھی تفصیلی تبادلہ خیال کیا گیا۔

ذرائع نے مزید بتایا کہ آئی ایم ایف نے لائن لاسز میں کمی اور ریکوری بڑھانے پر بھی زور دیا اور مطالبہ کیا کہ پاور سیکٹر میں ڈیجٹائزشن کے عمل کو لاگو کیا جائے گا۔