وزیر اعلیٰ پنجاب مریم نواز شریف کا کہنا ہے کہ الحمدللہ، پاکستان اور پاکستانی عوام کے لئے اچھے دن آ رہے ہیں۔

مریم نواز شریف نے کہا کہ یو اے ای کی جانب سے 10 ارب ڈالر کی سرمایہ کاری کے بیان کا خیرمقدم کرتے ہیں اور یہ مسلم لیگ ن کی حکومت پر بیرونی اعتماد کا ناقابل تردید ثبوت ہے۔

 مریم نواز کا یہ بھی کہنا ہے کہ مثبت معاشی عشاریے پاکستان کیلئے بہتر مستقبل کی نوید ہیں دوسری جانب پاکستان اسٹاک مارکیٹ روز بروز ریکارڈز قائم کر رہی ہے، اسٹاک مارکیٹ 100 انڈیکس کا مثبت رحجان خوش آئند ہے۔

وزیر اعلیٰ پنجاب کے مطابق روٹی سمیت دیگر اشیا کے نرخ میں مزید کمی ہوگی، مہنگائی کی شرح میں کمی آئے گی اور پاکستانی کرنسی مستحکم ہوگی کیونکہ حکومت کی پوری توجہ مہنگائی میں کمی لاکر عوام کو ریلیف دینے پر مرکوز ہے۔

مریم نواز نے کہا کہ مسلم لیگ (ن) کی حکومت کو تاجروں صنعتکاروں اورسرمایہ کاروں کا اعتماد حاصل ہے اور پاکستان میں فارن ڈائریکٹ انویسٹمنٹ کیلئے شہباز شریف حکومت کی کاوشیں قابل تحسین ہیں۔

مریم نواز نے مزید یہ بھی کہا کہ انشاللہ مسلم لیگ (ن) کی حکومت میں پاکستان اپنا کھویا ہوا مقام حاصل کرے گا اور دعا ہے کہ اللہ تعالیٰ پاکستان کی ترقی میں رکاوٹ ڈالے والے عناصر کے شر سے ملک کو محفوظ رکھے۔