لاہور: وزیراعلیٰ پنجاب مریم نواز شریف نے فیلڈ اسپتال اور کلینک آن وہیلز پراجیکٹ پر اظہار اطمینان کیا ہے۔

صحت مند پنجاب کے حوالے سے وزیر اعلیٰ پنجاب مریم نواز شریف کی کاوشیں رنگ لانے لگیں، شہروں اور دیہات میں فیلڈ اسپتال، کلینک آن وہیلز سے روزانہ ہزاروں مریض مستفید ہو رہے ہیں، کینسر، ٹی بی اور ہیپاٹائٹس کے مریضوں کو مفت ادویات گھر میں ملنے لگی ہیں۔

وزیر اعلیٰ مریم نواز نے فیلڈ اسپتال اور کلینک آن ویلز پراجیکٹ پر اطمینان کا اظہار کرتے ہوئے کہا کہ پنجاب کے ہر شہری کو خوش، خوشحال اور صحت مند دیکھنا چاہتے ہیں، ہر سیکٹر میری ترجیح ہے مگر صحت کی سہولتوں کی بہتری پر پوری توجہ ہے۔

انہوں نے کہا کہ شدید گرمی کے باوجود عوام کو گھر کی دہلیز پر علاج کی سہولتیں مہیا کرنے والے ڈاکٹرز اور اسٹاف قابل  تحسین ہیں، فیلڈ اسپتال اور کلینک آن ویلز کے ذریعے ہزاروں مریضوں کے علاج کی سروسز خود مانیٹر کررہی ہوں، ہیلتھ ریفارمز کے ثمرات دیکھ کر عوام کی مزید خدمت کرنے کا جذبہ مزید تقویت پکڑرہا ہے، جہاں ہیلتھ سہولتوں کا فقدان ہے، اسٹیٹ آف دی آرٹ فیسیلٹی پہنچارہے ہیں۔

وزیر اعلیٰ پنجاب کا کہنا تھا کہ صوبے میں مراکز صحت اور اسپتالو  کی اپ گریڈیشن اور ری ویمپنگ جاری ہے، صوبے کا پہلا سرکاری کینسر اسپتال فنکشنل کرنے کے لیے اقدامات کر رہے ہیں۔

مریم نواز نے مزید کہا کہ ہر ضلع میں مکمل کارڈیالوجی اور پیڈز بلاک بنانے کے پراجیکٹ پر کام شروع کردیا ہے، خدمت کا جذبہ ورثے میں ملا، اپنے عوام کے لئے ہر سہولت چاہتی ہوں۔