وزیر اعلیٰ پنجاب مریم نواز شریف نے ایجوکیشن ریفارمز کے پانچ سالہ پلان کا ماہانہ شیڈول طلب کرلیا۔

وزیر اعلیٰ مریم نواز کی زیر صدارت اسکول ایجوکیشن ریفامز سے متعلق خصوصی اجلاس ہوا جس میں پبلک اسکول ری آرگنائزیشن پروگرام کا تفصیلی جائزہ لیا گیا۔

اجلاس میں سیکریٹری اسکول ایجوکیشن نے اسکول نیو ٹریش پراجیکٹ پر پیش رفت سے آگاہ کیا جس کے بعد مریم نواز نے ایجوکیشن ریفارمز کے پانچ سالہ پلان کا ماہانہ شیڈول طلب کرتے ہوئے پرائمری اسکول ہیڈز کو 32298 کمپوٹر ٹیب دینے کی منظوری دیدی۔

 اجلاس کے دوران ایک ہزار ایلیمنٹری اسکولوں میں آئی ٹی اینڈ سائنس لیب قائم کرنے پر اتفاق کیا گیا اور سرکاری اسکولوں کے 3 لاکھ بچوں کو گوگل سرٹیفکیشن کے لئے معاہدے کی اصولی منظوری بھی دے دی گئی۔

اس کے علاوہ اجلاس میں پنجاب ایجوکیشن کریکولم اینڈ ٹریننگ کے قیام کی تجاویز اور سفارشات کا بھی جائزہ لیا گیا۔

اجلاس میں بریفنگ دی گئی کہ ایشئین ڈویلپمنٹ بینک سائنس لیب کے قیام کے لئے 100ملین ڈالر کی مالی معاونت کرے گی، ڈیجیٹل سفر برائے ٹیک ویلیپراجیکٹ کے تحت طلبہ کو گوگل سرٹیفکیشن کے مواقع ملیں گے اور 92فیصد سے زائد مفت کتابیں ڈیلیو کی جاچکی ہیں۔

اجلاس کے شرکاء سے گفتگو کرتے ہوئے وزیراعلیٰ پنجاب مریم نواز نے کہا کہ سرکاری اسکولوں میں کوالٹی آف ایجوکیشن کو ہر صورت بہترین کرنا ہے۔

واضح رہے کہ اجلاس میں سینیٹر پرویز رشید، صوبائی وزراء مریم اورنگزیب، رانا سکندر حیات، ایم پی اے ثانیہ عاشق، چیف سیکریٹری، سیکریٹری ایجوکیشن اور دیگر متعلقہ حکام شریک ہوئے۔