وفاقی دارالحکومت میں موسم برسات کی آمد کے ساتھ ہی ڈینگی کا خطرہ بڑھنے لگا ہے۔

  وفاقی وزیرداخلہ محسن نقوی نے اس حوالے سے اسلام آباد انتظامیہ کو الرٹ کردیا ہے اور چیئرمین سی ڈی اے و چیف کمشنر اسلام آباد محمد علی رندھاوا سے رابطہ کیا ہے۔

محسن نقوی نے ڈینگی سے نمٹنے کے لیے تمام ایس او پیز پر سختی سے عملدرآمد کا حکم دیتے ہوئے کہا کہ بارش کے پانی کی نشیبی علاقوں سے جلد نکاسی یقینی بنائی جائے۔

محسن نقوی نے یہ بھی کہا کہ انسداد ڈینگی کے وضع کردہ پلان پر من و عن عملدرآمد کیا جائے جبکہ انسداد ڈینگی اقدامات میں  کوتاہی یا غفلت برداشت نہیں کی جائے گی۔

وفاقی وزیرداخلہ نے انسداد ڈینگی پلان کی تمام سرگرمیوں کو باقاعدگی سے مانیٹر کرنے اس کے علاوہ شہر کے تمام ہسپتالوں اور لیبارٹریز سے ڈینگی کیسسز کےحوالے سے ڈیٹا جمع کرنے کی ہدایت دی۔

محسن نقوی نے کہا کہ تمام لیبز اور پرائیویٹ ہسپتالوں کی انتظامیہ کے ساتھ رابطہ رکھا جائے۔

 جبکہ دوسری جانب چئیرمین سی ڈی اے محمد علی رندھاوا نے کہا کہ اسلام آباد اور راولپنڈی کے باونڈری ایریاز میں انسداد ڈینگی ورکنگ گروپ قائم کیا جا رہا ہے جبکہ اسلام آباد اور راولپنڈی انتظامیہ انسداد ڈینگی کے لئے ایک ٹیم کے طور پر کام کرے گی۔

محمد علی رندھاوا کے مطابق اسلام آباد میں اب تک ڈینگی کے 9 کیس رپورٹ ہوئے ہیں۔