شہر قائد کے نصف حصے میں 24 گھنٹے کے لیے گیس  معطل کر دی گئی ہے۔

سوئی سدرن گیس کمپنی کے مطابق مرمتی کام کی وجہ سے شہر کے مختلف علاقوں میں اتوار کی صبح  5 بجےسے 24 گھنٹے کے لیے گیس بند کی گئی ہے، تاہم ایس ایس جی سی کی جانب سے شہر میں رات 10 بجے سے  شیڈول کے مطابق گیس بند کی گئی۔

 کراچی میں سوئی سدرن گیس کمپنی نے اتوار صبح 5 بجے 24 گھنٹے کے لیے گیس کی بندش والے علاقوں میں بھی رات 10 بجے سے گیس ہی بند کر دی، جس کی وجہ سے رات میں گیس کی بندش اور اتوار صبح 24 گھنٹے کے لیے بندش کا سامنا کرنے والے گھریلو صارفین ذہنی اذیت میں مبتلا ہوگئے۔

 گھریلو صارفین کے ساتھ سائٹ صنعتی ایریا، نارتھ کراچی صنعتی ایریا، ایف بی ایریا  صنعتی علاقوں کو بھی 24 گھنٹے کیلیے گیس بند کردی گئی ہے، اس کے علاوہ شہر کے دیگرصنعتی علاقوں لانڈھی نوری آباد، سائٹ سپر ہائی وے صنعتی علاقوں میں بھی صبح 8 بجے سے  24 گھنٹے کے لیے گیس بند کر دی گئی ہے۔

ترجمان سوئی سدرن کے مطابق سرجانی ٹائون، نارتھ کراچی کے تمام سیکٹرز، منگھو پیر، قصبہ اورنگی ٹائون کے تمام سیکٹر، اور نارتھ ناظم آباد کے تمام بلاک میں گیس بندرہے گی۔

اس کے علاوہ ایف بی ایریا گلبرگ کے تمام بلاکس، بفرزون، بلدیہ ٹاؤن، اتحاد ٹاؤن، اور ماڑی پور بھی  گیس بندش سے متاثر ہیں۔

ترجمان سوئی سدرن کے مطابق سینٹرل ریجن گلشن معمار ، احسن آباد، جہنجھار گوٹھ، یوسف گوٹھ، سرجانی ٹاون اور اطراف میں گیس کی فراہمی معطل رہے گی۔

گیس کی بندش 31 کلو میٹر 24  انچ قطر  ٹرانسمیشن پائپ لائن کو جوڑنے  کی وجہ سے کی گئی ہے۔