امریکہ میں سفیر پاکستان مسعود خان نے کہا کہ مجھے یقین ہے کہ آپ میرے جانشین کی مکمل حمایت کریں گے۔

مسعود خان نے اپنے الوداعی پیغام میں کہا کہ میں نے امریکہ میں پاکستان کے سفیر کی حیثیت سے اپنی ذمہ داری مکمل کر لی ہے، جبکہ مارچ 2022 سے ہم نے مشترکہ طور پرپاک امریکہ تعلقات کو مضبوط بنانے کی کوشش کی ہے اور اس سلسلے میں، میں امریکی انتظامیہ، کانگریس، ریاستی حکومتوں اور اسمبلیوں، بین الاقوامی مالیاتی اداروں (آئی ایف آئی)، تھنک ٹینکس، میڈیا، سول سوسائٹی اور نجی شعبے میں امریکی دوستوں کی طرف سے فراہم کی جانے والی حمایت کے لیے شکر گزار ہوں۔

سفیر پاکستان نے یہ بھی کہا کہ اس کے ساتھ ساتھ میں کمیونٹی کا بھی مشکور ہوں، اس کے علاوہ وقتاً فوقتاً اتار چڑھاؤ کے باوجود ہمیں پاکستان امریکہ تعلقات کو مضبوط بنانے کے لیے اپنی کوششوں میں ثابت قدم رہنا چاہیے۔

مسعود خان نے اپنے پیغام میں کہا کہ دونوں اقوام کے درمیان مضبوط تعلقات کا قیام ایک جاری عمل ہے جس کے پیچھے  77 سال کی تاریخ ہے اس کے علاوہ میں پاکستانی امریکن کمیونٹی کی حمایت اور افہام و تفہیم کا بھی مشکورہوں، وہ مضبوط پاک امریکہ شراکت داری کے لیے طاقت کا ایک ستون اور ایک مربوط  کڑی بن گئے ہیں۔

انہوں نے یہ بھی کہا کہ میں ان پاکستانی امریکی پیشہ ورانہ تنظیموں کا بھی مشکورہوں جنہوں نے مجھے، ہمارے مشنز، اورہماری دونوں اقوام کو مشکل لیکن امید افزا مراحل سے گزرنے میں مدد کی، جبکہ آپ کوالوداع کرتے ہوئے میں آپ سب کی کامیابی اورخوشحالی کے لئے دعاگو ہوں، پاکستان پراعتماد رکھیں اور پاکستان امریکہ تعلقات کو پروان چڑھاتے رہیں۔