وفاقی بجٹ پر تحقیقاتی رپورٹ کے مطابق حکومت گزشتہ مالی سال میں خسارہ کنٹرول میں ناکام رہی ہے۔

معاشی تحقیقاتی ادارے پرائم نے وفاقی بجٹ پر تحقیقاتی رپورٹ شائع کر دی ہے جس کے مطابق گزشتہ مالی سال بجٹ خسارہ 6900 ارب روپے تک محدود کرنے کا ہدف تھا،  تاہم گزشتہ مالی سال بجٹ خسارہ 7800 ارب روپے رہا،  بجٹ خسارہ 6.5 فیصد کے ہدف کی بجائے 7.4 فیصد رہا۔

 رپورٹ میں بتایا گیا کہ نئے بجٹ میں سالانہ 12 لاکھ آمدن والے سلیب پر انکم ٹیکس دگنا کردیا گیا، یعنی 1.2 کی بجائے 2.5 فیصد کیا گیا ہے۔

 اس کے علاوہ نئے بجٹ میں سالانہ 22 لاکھ آمدن والے سلیب پر ٹیکس کی شرح 6.3 سے بڑھا کر 8.1 فیصد کردی گئی، اس کے علاوہ نئے بجٹ میں سالانہ 32 لاکھ آمدن والے سلیب پر ٹیکس کی شرح 10.7 سے بڑھا کر 13.4 فیصد کردی گئی ہے۔

 رپورٹ کے مطابق نئے بجٹ میں سالانہ 42 لاکھ آمدن والے سلیب پر ٹیکس کی شرح 18.2 سے بڑھا کر 22.7 فیصد کردی گئی، اسی طرح سالانہ 62 لاکھ آمدن والے سلیب پر ٹیکس کی شرح 22.4 سے بڑھا کر 25.8 فیصد کردی گئی ہے۔

 بجٹ پر تحقیقاتی رپورٹ میں بتایا گیا کہ  نئے بجٹ میں سالانہ 12 ملین آمدن والے سلیب پر ٹیکس کی شرح 26.3 سے بڑھا کر 31.6 فیصد کردی گئی، اسی طرح سالانہ 15 ملین آمدن والے سلیب پر ٹیکس کی شرح 28.3 سے بڑھا کر 33.11 فیصد کردی گئی ہے۔