لاہور: پنجاب پھر لیڈ لے گیا، حکومت نے مختصر مدت میں طلبہ کے لیے الیکٹرک اور پیٹرول بائیکس کا وعدہ پورا کردیا۔

 تاریخ میں پہلی مرتبہ چیف منسٹر یوتھ انیشیٹو کے تحت طلبہ کے لئے الیکٹرک اور پیٹرول بائیکس کی فراہمی جاری ہے۔

وزیر اعلیٰ پنجاب مریم نواز شریف نے ای بائیک پراجیکٹ میں قسط کم از کم مقرر کرنے کی ہدایت دی اور کہا کہ پنجاب طلبہ کو سہولیات کی فراہمی میں ہمیشہ کی طرح لیڈ کرے گا۔

انہوں نے کہا کہ ای بائیک پراجیکٹ بائیکس کی فراہمی کا منصوبہ طلبہ کے لئے آسانیاں پیدا کرے گا، ذاتی سواری طلبہ کے روز مرہ زندگی میں پیسے اور وقت کی بچت یقینی بنائے گی، وقت کی بچت اور سفر میں آسانی طلبہ کی تعلیمی استعداد کار میں بہتری کا سبب بنے گی۔

مریم نواز نے کہا کہ والدین کے سائے سے محروم طلبہ کے لئے ای بائیک اسکیم میں والدین کی گارنٹی کی شرط ختم کر دی، پنجاب کو بھی دنیا کی طرح الیکٹرک ٹرانسپورٹ پر منتقل  کرنا چاہتے ہیں، پنجاب بھر میں ای بائیکس کی چارجنگ کے لیے سولر آئزڈ چارجنگ اسٹیشن بنائیں گے۔

وزیر اعلیٰ کا کہنا تھا کہ طلبہ کے لئے ای بائیک کی بیٹری کی انشورنس اور وارنٹی بھی دی گئی، بائیکس کے ساتھ ہیلمٹ اور کائٹ پروٹیکشن بھی ضروری ہے۔

انہوں نے مزید کہا کہ بچوں اور بچیوں کو آمدورفت میں آسانی کےلئے بائیکس دینے سے خوشی ملی، ای بائیک سے اسموگ اور ماحولیاتی آلودگی میں کمی آئے گی، کالجوں اور یونیورسٹیوں میں سولرآئزڈ چارجنگ اسٹیشن قائم کیے جائیں گے۔