میاں چنوں: پیرس اولمپکس 2024 میں جیولن تھرو میں عالمی ریکارڈ بنا کر تاریخ رقم کرنے والے اولمپک گولڈ میڈلسٹ ارشد ندیم اپنے آبائی علاقے میاں چنوں پہنچ گئے جہاں ان کا پرتپاک استقبال کیا گیا۔

عوام کی جانب سے قومی ہیرو ارشد ندیم پر پھولوں کی پتیاں نچھاور کی گئیں اور ڈھول کی تھاپ پر بھنگڑے پائے گئے۔

ارشد ندیم کی میاں چنوں آمد پر لوگوں کی جانب سے پاکستان زندہ باد ارشد ندیم زندہ باد کے نعرے بھی لگائے گئے۔

بعدازاں اولمپک گولڈ میڈلسٹ ارشد ندیم شہر کا چکر لگا کر اپنے آبائی گاؤں کی طرف روانہ ہوں گے۔

قبل ازیں اولمپک چیمپئن ارشد ندیم کی پرواز رات ایک بج کر 25 منٹ پر لاہور کے علامہ اقبال ایئرپورٹ پر پہنچی تھی، ارشد ندیم کے طیارے کو ایئرپورٹ پر واٹر کینن سلیوٹ پیش کر کے خوش آمدید کہا گیا تھا۔

ایئرپورٹ پر ارشد ندیم اور پاکستان زندہ باد کے نعرے لگائے گئے اور شہریوں نے اپنے ہیرو کو کندھوں پر اٹھایا۔

ارشد ندیم کی آمد پر ان کے مداحوں نے ان پر پھولوں کی پتیاں نچھاور کیں اور ڈھول بجا کر ’’پاکستان زندہ باد ارشد ندیم زندہ باد‘‘ کے نعروں سے ان کی واپسی کا جشن منایا۔

قومی ہیرو نے انہیں فراہم کی جانے والی امداد اور سہولیات پر حکومت اور وزیر اعظم شہباز شریف کا شکریہ ادا کیا۔

واضح رہے کہ ارشد ندیم نے اولمپک ریکارڈ کے ساتھ جیولن تھرو مقابلے میں گولڈ میڈل جیتا ہے، انہوں نے 92.97 میٹر تھرو کرکے نیا اولمپک ریکارڈ قائم کیا۔

مینز جیولن تھرو ایونٹ کے فائنل میں ارشد ندیم نے پاکستان کو 40 سال بعد گولڈ میڈل جتوایا، ارشد ندیم پاکستان کی جانب سے اولمپکس کے انفرادی مقابلوں میں گولڈ میڈل جیتنے والے پہلے ایتھلیٹ ہیں۔