کراچی: وزیراعظم محمد شہباز شریف کی زیر صدارت انسداد پولیو سے متعلق اجلاس میں تمام وفاقی اکائیوں کا انسداد پولیو کے لئے مشترکہ کوششوں پر اتفاق کیا گیا ہے۔

وزیراعظم محمد شہباز شریف کی زیر صدارت انسداد پولیو سے متعلق اہم جائزہ اجلاس آج کراچی میں منعقد ہوا جس میں گیٹس فاؤنڈیشن کے چیئرمین بل گیٹس اور صدر گلوبل ڈویلپمنٹ ڈاکٹر کرس ایلیئاس نے بذریعہ وڈیو لنک شرکت کی۔

علاوہ ازیں اجلاس میں وفاقی وزیر خزانہ و محصولات محمد اورنگزیب، وفاقی وزیر برائے اطلاعات و نشریات عطاء اللہ تارڑ، وفاقی وزیر برائے قومی غذائی تحفظ و تحقیق رانا تنویر حسین، وفاقی وزیر برائے نجکاری عبد العلیم خان، گورنر سندھ کامران ٹیسوری، وزیر اعلیٰ سندھ مراد علی شاہ ، وزیر اعظم کے کوآرڈینیٹر برائے قومی صحت ڈاکٹر ملک مختار احمد نے شرکت کی۔

وزیراعظم کی فوکل پرسن برائے انسداد پولیو ڈاکٹر عائشہ رضا فاروق، سیکرٹری قومی صحت ڈاکٹر ندیم محبوب اور نیشنل کوآرڈینیٹر برائے انسداد پولیو محمد انوار الحق، چاروں صوبوں، گلگت بلتستان اور آزاد جموں و کشمیر کے چیف سیکریٹریز ، انسپکٹرز جنرل پولیس، انسداد پولیو کے بین الاقوامی شراکت داروں اور متعلقہ اعلیٰ سرکاری افسران نے شرکت کی۔

وزیراعظم کی قیادت میں چاروں صوبائی حکومتیں، حکومت گلگت بلتستان اور حکومت آزاد جموں و کشمیر ملک سے پولیو کے مکمل خاتمے کے لیے پر عزم ہیں اور تمام وفاقی اکائیوں نے انسداد پولیو کے لئے مشترکہ کوششوں پر اتفاق کیا ہے۔

وزیر اعظم شہباز شریف کا کہنا ہے کہ ہم پولیو کے مکمل خاتمے کے لئے اپنے آہنی عزم کا اعادہ کرتے ہیں، پاکستان میں صحت کی دیکھ بال کے نظام خصوصاً انسداد پولیو کے لئے غیر معمولی مدد اور تعاون پر بل گیٹس فاؤنڈیشن کا شکریہ ادا کرتے ہیں۔

وزیراعظم نے انسداد پولیو کے حوالے سے حکومت کے دیگر شراکت داروں کا بھی شکریہ ادا کیا، وزیراعظم نے کہا کہ پولیو کے خاتمے کے لیے ہول آف دی گورنمنٹ اپروچ اپنائی گئی ہے، ہماری پوری کوشش ہے 2025 تک اس موذی وائرس کا مکمل خاتمہ کریں۔

شہباز شریف کا کہنا تھا کہ ملک سے پولیو کا مکمل خاتمے کے لیے ریاست کے تمام وسائل بروئے کار لائے جائیں، پاکستان میں ہر بچے کو ویکسین کی متعدد خوراکیں دی جائیں۔ ایسے علاقے جہاں سیکیورٹی کے حوالے سے چیلنجز درپیش ہیں وہاں ہر بچے کو پولیو ویکسین کی فراہمی یقینی بنائی جائے۔

وزیر اعظم نے مزید کہا کہ فرنٹ لائن پولیو ورکرز کی لگن، حکومت پاکستان کے عزم اور پارٹنرز کے تعاون سے پاکستان نے پولیو کے خلاف اہم پیش رفت کی ہے۔

دوسری جانب بل گیٹس نے انسداد پولیو کے لئے حکومتی اقدامات کی تعریف کی اور خیبر پختونخوا کے جنوبی اضلاع میں انسداد پولیو ویکسین کے قطرے پینے والے بچوں کی شرح میں اضافے پر اظہار اطمینان کیا۔

بل گیٹس نے کہا کہ یہ امر خوش آئند ہے کہ حکومت پاکستان کی جانب سے 40 لاکھ بچوں کو ان ایکٹیویٹڈ پولیو وائرس ویکسین (آئی پی وی) دینے کا منصوبہ ترتیب دیا گیا ہے، پولیو وائرس کے مکمل خاتمے تک کیسز رپورٹ ہوتے ہیں، انسداد پولیو کے اقدامات ک حوالے سے حکومتی کوششوں کا ساتھ دیتے رہیں گے۔