اسلام آباد: صدر مملکت آصف علی زرداری نے جعلی خبروں اور غلط معلومات کے پھیلاؤ کی حوصلہ شکنی پر زور دیا ہے۔

صدر آصف علی زرداری سے چیئرمین پیمرا محمد سلیم نے ملاقات کی، چیئرمین پیمرا نے ایوان صدر میں صدر مملکت کو پیمرا رپورٹ 2021-23 پیش کی جب کہ صدر مملکت نے جعلی خبروں اور غلط معلومات کے پھیلاؤ کی حوصلہ شکنی کی ضرورت پر زور دیا۔

صدر مملکت آصف علی زرداری نے کہا کہ حقائق کی جانچ پڑتال اور معلومات کی تصدیق کے کلچر کو فروغ دینا ہوگا۔ میڈیا معاشرے میں رواداری، اتحاد اور اخلاقی اقدار کے فروغ میں کردار ادا کرے۔

صدر مملکت کا کہنا ہے کہ میڈیا صحافت کے اعلیٰ ترین معیار کو برقرار رکھے، جدید مواصلاتی ٹیکنالوجی کی وجہ سے نئے چیلنجز درپیش ہیں، میڈیا رائے عامہ کی تشکیل میں ذمہ دارانہ اور تعمیری کردار ادا کرے۔

آصف زرداری کہتے ہیں کہ غلط معلومات اور پروپیگنڈے کے حوالے سے ضابطہ اخلاق پر عمل ہونا چاہیے۔ صدر مملکت نے جدید ٹیکنالوجی اور باصلاحیت انسانی وسائل سے پیمرا کی استعدادِ کار بہتر بنانے کی ضرورت پر بھی زور دیا۔

صدر مملکت نے مزید کہا کہ میڈیا ملک کا بہتر تشخص، سماجی و اقتصادی مسائل بارے شعور اجاگر کرے۔

چیئرمین پیمرا نے صدر مملکت کو میڈیا منظرنامے کی ریگولیشن اور ترقی میں پیمرا کے کردار اور کارکردگی بارے آگاہ کیا جب کہ صدر مملکت نے پیمرا کو مزید مضبوط بنانے کے لیے اپنی حمایت کا اعادہ کیا۔