پنجاب حکومت نے تمام تعلیمی بورڈ ز کے پوزیشن ہولڈرزطلبہ کو انعام دینے کا فیصلہ کیا ہے۔

 وزیراعلیٰ مریم نوازشریف کی زیر صدارت خصوصی اجلاس ہوا جس میں پوزیشن ہولڈرز کو انعام دینے کی منظوری دے دی گئی، اور ہدایت دی کہ طلبہ کے ایک ایک ٹیچرکو بھی انعام دیا جائے گا، اس کے علاوہ طلبہ کیلئے وزیراعلیٰ مریم نوازشریف نے اسٹوڈنٹس سکالرشپ کی بھی منظوری دے دی۔

اسٹوڈنٹس اسکالرشپ کے تحت 25 ہزار طلبہ کے تمام تعلیمی اخراجات حکومت پنجاب ادا کرے گی، جبکہ حکومت پنجاب 25 ہزار طلبہ کے تعلیمی اخراجات کیلئے سالانہ سوا سو ارب سے زائد ادا کرے گی۔

وزیراعلیٰ مریم نوازشریف کی ہدایت پر طالبات کیلئے ٹرانسپورٹ پروگرام کا آغازکیا گیا ہے، جس کے تحت پنجاب کے 60 گرلز کالجز کو پہلے مرحلے میں بسیں دی جائیں گی، اس کے علاوہ پنجاب کے تمام اضلاع میں آئی ٹی حب کے قیام کی بھی منظوری دے دی گئی ہے، وزیراعلیٰ مریم نوازشریف نے آئی ٹی حب کیلئے فوری اقدامات کا حکم دے دیا، جبکہ اجلاس میں لیپ ٹاپ اسکیم کیلئے ضروری اقدامات کی ہدایت بھی کی۔

اجلاس میں سینئر صوبائی وزیر مریم اورنگزیب، صوبائی وزیر تعلیم رانا سکندرحیات، چیف سیکرٹری زاہد اختر زمان، پرنسپل سیکرٹری ساجد ظفر ڈال اور سیکرٹری ہائر ایجوکیشن ڈاکٹر فرخ نوید نے شرکت کی۔