گورنر سندھ کامران خان ٹیسوری نے پیرس اولمپکس کے جیولین تھرو ایونٹ میں گولڈ میڈل جیتنے والے پاکستانی اولمپئین ارشد ندیم کے لئے 20 لاکھ کے انعام کا اعلان کردیا ہے۔

کامران خان ٹیسوری نے گورنر ہاؤس میں پریس کانفرنس کرتے ہوئے کہا کہ ارشد ندیم نے پاکستان کا سر فخر سے بلند کیا ہے، میں نے ذاتی طور پر 20 لاکھ کے انعام کا اعلان کیا ہے۔

انہوں نے کہا کہ 14 اگست تک وہ پاکستان آگئے تو انہیں بھی تقریب میں مدعو کیا جائے گا، اس تقریب میں چاروں صوبوں کی نمائندگی کی جائے گی، موسیقی کے شوقین افراد کو بھی پرفارمنس کا موقع دیا جائے گا۔

ان کا کہنا تھا کہ بہترین کارکردگی پر ایک لاکھ کا انعام دیا جائے گا، ایک اور میڈیا ٹاک منعقد کر کے اس تقریب پر مزید بریفنگ دی جائے گی، تقریب میں 5 لاکھ افراد کی آمد متوقع ہے، اس تقریب کی تیاریاں کل سے ہی شروع ہو جائے گی۔

کامران خان ٹیسوری نے کہا کہ اس تقریب کا نام “ہم فرد نہیں قوم ہیں” ہوگا، یہ کراچی والوں کیلئے تحفہ ہے، کراچی والوں کیلئے کئی دن سے کوئی تقریب نہیں ہوئی تھی، ایسی تقریب کرنے جا رہے ہیں جو پہلی بار ہو رہی ہے، معیشت کی بہتری کیلئے بھی کام کر رہے ہیں جلد بڑی خوشی ملے گی۔