پاکستان پیپلز پارٹی کے چیئرمین بلاول بھٹو زرداری نے کہا ہے کہ نوجوان پاکستان کے مستقبل کو تشکیل دینے کی طاقت رکھتے ہیں۔

بلاول بھٹو نے نوجوانوں کے عالمی دن پر پیغام دیتے ہوئے کہا کہ پیپلز پارٹی اپنی اولین ترجیحات میں نوجوانوں کے بااختیار بنانے کو ہمیشہ شامل رکھے گی۔

چیئرمین پی پی نے نوجوان پاکستانیوں کو عالمی دن کی مبارکباد دیتے ہوئے کہا کہ نوجوانوں کو صلاحیتیں بروئے کار لانے  کے لیے مواقع کی فراہمی کی کوششوں میں اپنا قائدانہ کردار جاری رکھیں گے۔

انہوں نے کہا کہ نوجوان پاکستان کے مستقبل کے حقیقی معمار ہیں، ریاست و معاشرے دونوں کا فرض ہے کہ نوجوانوں کو تعلیم، ہنر اور مواقع فراہم کریں، نوجوانوں کو تعلیم، ہنر اور مواقع فراہم کیے جائیں تاکہ وہ ملکی ترقی میں اپنا کردار ادا کرسکیں۔

بلاول بھٹو نے کہا کہ نوجوانوں کو شہید بھٹو اور شہید محترمہ بینظیر بھٹو کی زندگی اور نظریات کا مطالعہ کرنا چاہیے، قائدِ عوام اور شہید محترمہ بینظیر بھٹو نے عوام کے بنیادی حقوق کے لیے جدوجہد کی، انہوں نے قوم کی خاطر اپنی جانیں قربان کردیں۔

انکا کہنا تھا کہ نوجوانوں جمہوری عمل میں بڑھ چڑھ کر حصہ لیں اور اپنے آواز  کو مثبت تبدیلی کے لیے استعمال کریں، نوجوان پاکستان کے مستقبل کو تشکیل دینے کی طاقت رکھتے ہیں۔

چیئرمین پی پی نے کہا کہ نوجوانو! آپ کی شمولیت ایک بہتر پاکستان کی تعمیر کے لیے ضروری ہے، ایک ایسا پاکستان جہاں انصاف، مساوات اور جمہوریت کے اقدار کی پاسداری ہو۔

 انہوں نے کہا کہ پیپلز پارٹی نوجوانوں کے حقوق اور امنگوں کی حمایت جاری رکھے گی، پیپلز پارٹی سب کے لیے ایک خوشحال مستقبل کی تعمیر کے لیے مل کر کام کرنے کے لیے پرعزم ہے۔

بلاول بھٹو نے نوجوانوں کے عالمی دن کے متعلق اقوام متحدہ کے 2024 کے تھیم کی توثیق کی اور کہا کہ “کلک سے ترقی تک پائیدار ترقی کے لیے نوجوانوں کے ڈیجیٹل راستے” کی توثیق کرتا ہوں، اقوام متحدہ کی تھیم پائیدار ترقی کے فروغ میں ڈیجیٹل ٹیکنالوجی کے اہم کردار کو اجاگر کرتی ہے۔