وزیراعظم محمد شہباز شریف نے کہا کہ شہدائے پولیس قوم کا فخر، شہداء کے بچوں کی تعلیم و صحت کیلئے ہرممکن اقدامات اٹھائیں گے۔

یوم شہدائے پولیس کے موقع پر وزیراعظم محمد شہباز شریف نے پولیس کے شہید افسران اور اہلکاروں کو خراج عقیدت پیش کرتے ہوئے کہا کہ یوم شہدائے پولیس، بہادر پولیس افسران اور اہلکاروں کی جرات اور بہادری کو یاد کرنے کا دن ہے۔

  وزیراعظم نے کہا کہ جرائم کی سرکوبی کرتے ہوئے اپنی جانوں کا نذرانہ پیش کرنے والے پولیس اہلکاروں کی قربانیاں لازوال ہیں، جبکہ دہشت گردی کے خلاف جنگ میں پولیس نے ہمیشہ ہراول دستے کے طور پر اپنی زمہ داریاں نبھائیں ہیں۔

شہباز شریف نے کہا کہ پولیس اہلکاروں نے ہمیشہ اپنی جانوں کا نذرانہ دے کر قوم کا مستقبل محفوظ اور روشن بنایا، شہدائے پولیس قوم کا فخر ہیں؛ پوری قوم شہید پولیس اہلکاروں کو سلام پیش کرتی ہے۔

  وزیراعظم نے کہا کہ شہید افسران اور اہلکاروں کے خاندانوں کا خیال رکھنا حکومت کی ذمہ داری ہے، اس حوالے سے کوئی کوتاہی نہیں ہونے دیں گے، شہداء کے خاندانوں کا ہر طرح سے خیال رکھا جائے گا۔

وزیراعظم نے مزید یہ بھی کہا کہ بطور وزیراعلیٰ پنجاب اپنے دور میں شہدائے پولیس کے خاندانوں کے لئے ایک بڑا اور تاریخی پیکج دیا تھا۔