کراچی: پاکستان سول ایوی ایشن اتھارٹی (سی اے اے) کی تقسیم کرتے ہوئے تین نئے محکمے قائم کردیے گئے ہیں جس کا نوٹیفکیشن بھی جاری کردیا گیا ہے۔

سی اے اے کی جانب سے جاری کردہ نوٹیفکیشن کے مطابق ریگولیٹری شعبہ جات پاکستان سول ایوی ایشن اتھارٹی کا حصہ ہوں گے، کمرشل ایئرپورٹس کو پاکستان ایئرپورٹس اتھارٹی کا حصہ بنا کر الگ محکمہ بنادیا گیا۔

نوٹیفکیشن میں بتایا گیا ہے کہ تیسرا محکمہ طیاروں کے حادثات کی تحقیقات سے متعلق بورڈ آف سیفٹی انویسٹی گیشن ہے، سیفٹی بورڈ طیاروں کے حادثات کی تحقیقات کرے گا۔

اس کے علاوہ سول ایوی ایشن، ایئرپورٹس اتھارٹی، بورڈ آف سیفٹی انویسٹی گیشن کے قیام کے الگ الگ نوٹیفکیشن جاری کیے گئے ہیں۔

سی اے اے نے نوٹیفکیشن میں مزید بتایا کہ فلائٹ اسٹینڈرڈ، پائلٹ لائسنسنگ، ایروڈروم ایئراسپیس سول ایوی ایشن اتھارٹی کا حصہ ہوں گے جبکہ ایئر وردی نیس، ایئر ٹرانسپورٹ، ایرومیڈیکل بھی سول ایوی ایشن اتھارٹی کا حصہ ہوں گے، ملک بھر کے کمرشل ایئرپورٹس بھی پاکستان ایئرپورٹ اتھارٹی میں شامل ہیں۔

یاد رہے کہ ملازمین کو انکی قابلیت اور تجربے کے حساب سے تینوں محکموں میں تقسیم کردیا گیا جبکہ مالیاتی اثاثوں کو بھی تینوں محکموں میں تقسیم کیا گیا ہے، تاہم تینوں محکموں کے سربراہان کے لیے علیحدہ نوٹیفکیشن جاری ہوگا۔