اسلام آباد: وفاقی وزیر داخلہ محسن نقوی نے گورنر خیبر پختونخوا فیصل کریم کنڈی کو صوبے میں قیام امن کیلئے ہر ممکن تعاون کی یقین دہانی کرادی۔

گورنر کے پی فیصل کریم کنڈی وزارت داخلہ پہنچے جہاں انکی وزیر داخلہ محسن نقوی سے ملاقات ہوئی جس میں خیبر پختونخوا کی مجموعی صورتحال، امن عامہ اور کرم کے افسوسناک واقعات پر تبادلہ خیال ہوا۔

ملاقات میں وزیر داخلہ اور گورنر خیبرپختونخوا نے کرم کے واقعات پر سخت تشویش کا اظہار کیا اور مستقبل میں ایسے واقعات کے سدباب کے لئے کثیر الجہتی مشترکہ حکمت عملی ترتیب دینے پر اتفاق کیا۔

دوران ملاقات محسن نقوی نے گفتگو کرتے ہوئے کہا کہ خیبر پختونخوا میں امن و امان کا قیام حکومت کی اولین ترجیح ہے، کرم میں اراضی کے تنازع پر قیمتی انسانی جانوں کا ضیاع انتہائی افسوسناک ہے، بعض عناصر نے دو گروپوں کے مابین تصادم کو غلط رنگ دیا جس سے کشیدگی میں اضافہ ہوا۔

انکا کہنا تھا کہ کرم سے تعلق رکھنے والے مجلس وحدت المسلمین کے ایم  این اے حمید حسین کی قیادت میں معززین علاقہ سے ملاقات کی اور صورتحال کو معمول پر لانے کے لیے فوری اقدامات کیے، سیکیورٹی فورسز نے بھی صورتحال کےتناظر میں موثر اقدامات کیے۔

وزیر داخلہ نے مزید کہا کہ پوری کوشش ہے کہ کرم سمیت خیبرپختونخوا میں امن عامہ کی صورتحال کو بہتر بنایا جائے، امن کی کوششوں کو سبوتاژ کرنے میں بیرونی ہاتھ نظر انداز نہیں کیا جاسکتا۔

بعدازاں گورنر خیبر پختونخوا فیصل کریم کنڈی نے قیام امن کیلئے تعاون پر وزیر داخلہ محسن نقوی کا شکریہ ادا کیا۔