نیشنل پارلیمنٹری ٹاسک فورس کے کنوینر بلال اظہر کیانی نے کہا کہ یہ حکومت پھولوں کا تاج نہیں تھی، ہم نے مشکل حالات میں ذمہ داری اٹھائی۔

وزیراعظم کے معیشت و توانائی کے کوآرڈینیٹر بلال اظہر کیانی نے پریس کانفرنس کرتے ہوئے کہا کہ ن لیگ کامشن مہنگائی کو کم کرنا اورروزگاربڑھاناہے، جبکہ عوام کو خودسوچنا ہوگا کہ 9 مئی والوں کے ساتھ ہیں یامہنگائی کم کرنے والوں کے؟ 9 مئی پی ٹی آئی کی سوچ کا تسلسل تھا۔

بلال اظہرکیانی نے کہا کہ شہروں میں کھانے کی اشیا کی شرح 3.4 اوردیہات میں 1.3 فیصد ہے، یہ شہبازشریف اور مریم نواز کی وجہ سے ہے، جبکہ عوام کی قوت خرید کومزید آسان کرنا ہے۔

بلال اظہر کیانی نے یہ بھی کہا کہ وزیراعظم اور وزیراعلیٰ عوام کی زندگی میں بہتری لانا چاہتے ہیں، ان کی کوشش ہے کہ لوگوں کا روزگار کیسے بڑھے، ہم یہ نہیں کہتے کہ ہمارا کام آلو، پیاز، ٹماٹرکی قیمتیں دیکھنا نہیں، خان صاحب کہتے تھے یہ ان کا کام نہیں ہے،  ہم سمجھتے ہیں یہ ہمارا کام ہے۔

بلال اظہرکیانی نے کہا کہ لیگی حکومت میں مہنگائی میں کمی، معاشی استحکام اورترقی ہدف رہی، وزیراعظم نے عوام کو تمام مشکلات سے آگاہ کیا، وزیراعظم اور وزیراعلیٰ کی ترجیح عوام کوریلیف دینا ہے۔

بلال اظہر کیانی نے کہا کہ عوام کی زندگی میں بہتری لانا اولین ترجیح ہے، جولائی میں مہنگائی کی شرح 11.1 فیصد رہی، فروری میں مہنگائی کی شرح  23.1 فیصد تھی، یہ شرح پچھلے 3 سالوں کی کم ترین شرح ہے۔

بلال اظہر کیانی نے پریس کانفرنس کے دوران یہ بھی کہا کہ جوآکر تنقید کرتے ہیں انھوں نے حکومت نہیں لی تھی، ہم پہلے بھی بہتری لائے اور اب بھی، ہماری حکومت اس ہی جذبے کے ساتھ کام کررہی ہے۔

 بلال اظہر کیانی نے کہا کہ پی ٹی آئی اپنے حقائق پیش نہیں کرتے، آپ ہماری حکومت پر بے شک سوال کریں، گزشتہ حکومت سے بھی ان کی کارکردگی کے سوال کریں۔

بلال اظہرکیانی نے کہا کہ حکومت مہنگائی میں کمی سمیت عوام کو ریلیف دینے کیلئے کوشاں ہے، مرکزی اور پنجاب حکومت عوام کی ترقی کیلئے کام کر رہی ہے۔ وزیراعظم ایف بی آرمیں اصلاحات پرخاص توجہ دے رہے ہیں، 200 یونٹ تک بجلی صارفین کو50 ارب کی سبسڈی دے رہے ہیں۔