اسلام آباد: وفاقی حکومت نے کل قومی اسمبلی اور سینیٹ کے اجلاسوں میں حکمران اتحاد کے ارکان کی تقریباً مکمل حاضری یقینی بنانے کے لئے ایڑھی چوٹی کا زور لگا دیا ہے۔

 ذرائع کے مطابق حکمران اتحاد میں شامل تمام جماعتوں کے سربراہان پارلیمانی لیڈرز اور چیف وہپس ارکان کو کل ہر صورت اجلاس میں شرکت کی ہدایت کررہے ہیں۔

پارلیمانی ذرائع کا کہنا ہے کہ قومی اسمبلی و سینیٹ میں حکومتی اتحاد کی زیادہ سے زیادہ تعداد شو کرنے کا مقصد سپریم کورٹ کے فیصلے کے خلاف بیانیہ بنانا ہے، حکومت دونوں ایوانوں میں زیادہ سے زیادہ ارکان کی تعداد شو کرکے بیانیہ بنائے گی کہ اتنی بڑی تعداد نے مخصوص نشستیں دینے کے خلاف ووٹ دیا۔

ذرائع کے مطابق حکمران اتحاد کی طرف سے اپنے ارکان قومی وسینیٹ کو آج اتوار کو ہی اسلام آباد پہنچنے کی ہدایات جاری کردی گئی ہیں، حکمران اتحاد کی جماعتوں کے سربراہان، پارلیمانی لیڈرز اور چیف وہپس اپنی اپنی جماعتوں کے ارکان سے رابطے کررہے ہیں۔

ذرائع کا کہنا ہے کہ تقریباً گزشتہ ایک ماہ سے سیاسی منظر سے غائب رہنے والے بلاول بھٹو زرداری آج الیکشن ترمیمی ایکٹ کی منظوری کے لئے وطن واپس پہنچ رہے ہیں جبکہ چیئرمین سینیٹ سید یوسف رضا گیلانی بھی برطانیہ سے آج وطن واپس پہنچ رہے ہیں۔

علاوہ ازیں سپریم کورٹ کو سخت پیغام دینے کے لئے خصوصی طور پر طے کیا گیا ہے کہ اتحادی جماعتوں کے تقریباً تمام سربراہان اجلاس میں موجود ہوں۔

ذرائع نے مزید بتایا کہ مولانا فضل الرحمان قطر میں حماس رہنما اسماعیل ہنیہ شہید کی تعزیت کے بعد آج وطن واپس پہنچ رہے ہیں، جے یو آئی نے الیکشن ترمیمی ایکٹ کی منظوری میں غیر جانبدار رہنے کا فیصلہ کیا ہے، جے یو آئی الیکشن ترمیمی ایکٹ 2017 کی منظوری کے وقت قائمہ کمیٹی میں بھی غیر جانبدار رہی تھی۔