اسلام آباد: وفاقی وزیر اطلاعات عطاء اللہ تارڑ کا کہنا ہے کہ اسپیکر قومی اسمبلی سردار ایاز صادق نے پارلیمان کی بالادستی کے لئے چیف الیکشن کمشنر کو خط لکھا جوکہ ایک سنگ میل ہے۔

وفاقی وزیر اطلاعات عطاء اللہ تارڑ نے میڈیا سے گفتگو کرتے ہوئے کہا کہ اسپیکر قومی اسمبلی سردار ایاز صادق نے پارلیمان کی بالادستی کے لئے چیف الیکشن کمشنر کو خط لکھا جب کہ انہوں نے ہمیشہ اسپیکر کی کرسی کے ساتھ انصاف کیا ہے۔

وفاقی وزیر اطلاعات کا کہنا ہے کہ پارلیمان میں موجود تمام جماعتوں کے ساتھ ان کا رویہ ہمیشہ اچھا رہا اور ہمیشہ بہترین انداز میں امور انجام دیے جب کہ ان کی ہمیشہ کوشش ہوتی ہے کہ کسی رکن کی حق تلفی نہ ہو اور سیاسی جماعتوں نے ہمیشہ اسپیکر قومی اسمبلی کے فیصلوں کی تائید کی ہے۔

ان کا کہنا تھا کہ اسپیکر قومی اسمبلی کا الیکشن کمیشن کو خط سنگ میل ہے، آئین میں پارلیمنٹ کو قانون سازی کا اختیار دیا گیا ہے اور یہ اختیار کسی دوسرے ادارے کے پاس نہیں جب کہ پارلیمنٹ بالادست ادارہ ہے اور سپریم کورٹ کی آرٹیکل 63 اے کی تشریح آئین دوبارہ لکھنے کے مترادف ہے۔

انہوں نے سوال اٹھایا کہ کسی پارٹی میں شامل ہونے والا رکن دوبارہ کسی اور جماعت میں کیسے شامل ہوسکتا ہے؟، مخصوص نشستوں سے متعلق عدالتی فیصلے نے بہت سے سوالوں کو جنم دیا جب کہ اسپیکر نے آج جو قدم اٹھایا اس پر ہم انہیں خراج تحسین پیش کرتے ہیں۔

وزیر اطلاعات مزید کہتے ہیں کہ کسی ادارے کو حق حاصل نہیں کہ وہ آئین کی اپنی مرضی سے تشریح کرے اور پارلیمان کو کمزور کرنے کی کوشش کرے، آئین اور قانون عوام کے منتخب نمائندوں کا حق ہے، پارلیمان کی بالادستی کے لئے ہم اپنا کردار ادا کرتے رہیں گے۔