چیئرمین پاکستان تحریک انصاف بیرسٹر گوہرعلی خان کو رہا کردیا گیا ہے۔

پولیس کے مطابق بیرسٹر گوہر کو سنگجانی کے مقدمے سے ڈسچارج کردیا گیا۔

بیرسٹر گوہر نے میڈیا سے گفتگو کرتے ہوئے کہا کہ پولیس نے گرفتار کرکے مقدموں سے متعلق پوچھ گچھ کی، پولیس نے بتایا کہ مجھ پر کوئی مقدمہ نہیں۔

انہوں نے کہا کہ 10 ستمبر کا دن پی ٹی آئی کبھی نہیں بھولے گی، گزشتہ روز نقاب پوش افراد پارلیمان میں داخل ہوئے، کل ہمارے 10 ایم این ایز کو گرفتار کیا گیا۔

ان کا کہنا تھا کہ شیر افضل مروت اور مجھے دروازے سے گرفتار کیا گیا، امید کرتے ہیں اسپیکر قومی اسمبلی معاملے کی تہہ تک جائیں گے، اسمبلی کے دروازے کے باہر پولیس تعینات تھی، کل خود گرفتاری دی تھی۔

بیرسٹر گوہر نے کہا کہ امید کرتے ہیں اس واقعے کی سی سی ٹی وی منظرِ عام پر آئے گی، سختیاں کی گئیں، چادر اور چار دیواری کا تقدس پامال کیا گیا، حکومت کے ایسے کام سے غیر سیاسی لوگ زور پکڑیں گے۔

چیئرمین پاکستان تحریک انصاف کا مزید کہنا تھا کہ حکومت نے این آر او اپنے آپ کو دیا ہے، اقتدار میں آکر غلط قانون سازی ختم کریں گے۔

واضح رہے کہ بیرسٹر گوہر کو گزشتہ روز اسلام آباد پولیس نے پارلیمنٹ ہاؤس کے باہر سے گرفتار کیا تھا۔