امیر جماعت اسلامی پاکستان حافظ نعیم الرحمان نے ملک میں جاگیر دارانہ نظام کو بدلنے کا مطالبہ کردیا۔

امیر جماعت اسلامی پاکستان حافظ نعیم الرحمان نے سیمینار سے خطاب میں کہا کہ اس پورے جاگیر دارانہ نظام کو بدلنے کی ضرورت ہے، جب کوئی سیاسی جماعت اسٹیبلشمنٹ پر تنقید کرتی ہے تو وہ معتوب ٹھہرتی ہے، جلسوں پر پابندی لگ جاتی ہے، پارلیمان سے گرفتاریاں کی جاتی ہیں۔

حافظ نعیم الرحمان کا کہنا ہے کہ صرف جماعت اسلامی اصل جمہوری پارٹی ہے، باقی سب اپنے خاندانوں کو نوازنے والی پارٹیاں ہیں، اتنی مہنگی توانائی اور گیس بحران میں انڈسٹری کیسے آگے بڑھے گی۔

اب کا کہنا تھا کہ صرف ایک ادارے ایف بی آر نے ایک سال میں 1299 ارب روپے کی ٹیکس نیٹ سے کرپشن کی، ایف بی آر کی کرپشن ختم کرنا کس کی ذمہ داری ہے، ان کی تنخواہیں ہم کیوں دے رہے ہیں۔ آئی ایم ایف شرائط پر ہم بجلی تو مہنگی کرسکتے ہیں لیکن ایف بی آر کو ٹھیک نہیں کر سکتے،

امیر جماعت اسلامی نے کہا کہ یہ کہتے ہیں آئی پی پیز معاہدوں پر نظر ثانی نہیں کرسکتے، یہ ساری آئی پی پیز اپنے لوگوں کو نوازنے کے لئے لگائی گئیں۔ اگر ہم اپنی لوکل آئی پی پیز سے بات کر لیں تو پورا یقین ہے چینی آئی پی پیز کمپنیاں نظر ثانی کے لئے تیار ہوجائیں گی، جب تک آپ اپنے گھر کو ٹھیک نہیں کریں گے تو دوسرے آپ کو ریلیف کیوں دیں گے۔

حافظ نعیم کہتے ہیں کہ آئی پی پیز معاہدوں پر نظرثانی، کیپسٹی چارجز کا خاتمہ اور بند پاور پلانٹس کو ادائیگیاں ختم کی جائیں، آئی پی پیز کے خلاف سب کو اکٹھا ہونا ہوگا، کوئی بھی اس مسئلے پر آواز اٹھائے ہم ساتھ دیں گے۔ ان جماعتوں کے اپنے قائدین کی اپنی آئی پی پیز کمپنیاں ہیں، اس لیے آواز نہیں اٹھاتے۔

انہوں نے حکومت کو خبردار کرتے ہوئے کہا کہ اگر ہمارے جائز مطالبات نہ سنے گئے تو شاید  عوام کو بجلی بل ادا نہ کرنے کی کال دینی پڑے، پاکستان وسائل سے مالامال اور باصلاحیت لوگوں کا وطن ہے۔ اسٹڈیز کے مطابق پاکستان میں یہ صلاحیت موجود ہے کہ یہ تیزی سے ترقی کرسکتا ہے۔

ان کا مزید کہنا تھا تاجر دوست اسکیم تاجر دشمن اسکیم ہے، ٹیکسز کی بھرمار کی وجہ سے بزنس طبقہ ترقی نہیں کر پارہا جب کہ 77 سالوں سے پاکستان پر حکومت کرنے والے طبقہ میں 33 سال مارشل لاء کے تھے، باقی ادوار میں بھی انہوں نے اپنی مرضی چلانے کے انتظامات کر رکھے تھے۔