نائب وزیراعظم و وزیر خارجہ اسحاق ڈار نے کہا ہے کہ مسئلہ کشمیر ہو یا فلسطین، پاکستان اپنی ذمہ داریاں ادا کرتا رہے گا۔

نائب وزیراعظم و وزیر خارجہ اسحاق ڈار نے لندن میں نیوز کانفرنس کرتے ہوئے کہا کہ اسلاموفوبیا کی روک تھام کے لیے بھی ہر فورم پر آواز اٹھائی، ہماری کوششوں سے اسلاموفوبیا پر او آئی سی کا خصوصی نمائندہ مقرر کیا گیا۔

انہوں نے کہا کہ مشرق وسطیٰ میں پائیدار امن دو ریاستی حل سے ممکن ہے، نہتے فلسطینیوں کے لیے مصر اور اردن کے ذریعے امدادی سامان بھجوایا۔

ان کا کہنا تھا کہ برطانیہ کے ساتھ پاکستان کے تعلقات اہمیت کے حامل ہیں، 17 لاکھ پاکستانی برطانیہ میں مقیم ہیں، برطانیہ کا دورہ انتہائی مصروفیت اوراہمیت کا حامل تھا، برطانوی نائب وزیراعظم اور دیگررہنماؤں سے مفید ملاقاتیں ہوئیں۔

اسحاق ڈار نے کہا کہ پاکستان 182 ملکوں کی حمایت سے سلامتی کونسل کا غیر مستقل رکن منتخب ہوا، برطانوی قیادت سے پی آئی اے کی پروازوں کی بحالی پر گفتگو ہوئی، پی ٹی آئی دور میں ایک وزیر کے بیان سے صورتحال خراب ہوئی، پروازوں کی بحالی کے معاملے پر یورپی یونین سے بھی گفتگو جاری ہے۔

نائب وزیراعظم و وزیر خارجہ کا کہنا تھا کہ ہوا بازی کے شعبے میں عالمی معیارات کی پاسداری کے لیے پُرعزم ہیں، پروازوں کی بحالی کے لیے تمام اقدامات کیے جارہے ہیں، پہلے مرحلے میں اسلام آباد ایئرپورٹ کی آؤٹ سورسنگ کی جارہی ہے۔