اسلام آباد: وزیر دفاع خواجہ آصف نے کہا ہے کہ آئینی ترامیم آج ہی پارلیمنٹ میں لائی جائیں گی۔

وفاقی وزیر خواجہ آصف نے میڈیا سے گفتگو کرتے ہوئے کہا کہ مطلوبہ ارکان پورے ہیں، اگر اپوزیشن یہ کہہ دے کہ آج ہمیں شکست ہونی ہے، تو پھر تو ان کے لئے پلے کچھ نہیں رہتا۔

انہوں نے کہا کہ جس نے دکان پر سودا بیچنا ہوتا ہے وہ تو کہے گا میرا سودا بہترین ہے۔

خواجہ آصف نے کہا کہ قاضی فائز عیسی’ کو توسیع دینے کی بات درست نہیں، جو بھی جوڈیشل ریفارمز آئیں گے، وہ اجتماعی نوعیت کے ہوں گے انفرادی نہیں۔

وزیر دفاع نے مزید کہا کہ چلیں ہماری نیت ٹھیک نہ سہی کام تو ٹھیک کر رہے ہیں، امید ہے مولانا ووٹ دیں گے۔

واضح رہے کہ قومی اسمبلی اور سینیٹ میں آئینی ترامیم کا مجوزہ پیکج آج پیش کیے جانے کا امکان ہے۔

ذرائع کے مطابق آئینی ترمیم کے ذریعے آئینی عدالت قائم کی جائے گی، آئین کے آرٹیکل 63 اے میں بھی ترمیم کی جائے گی۔

ذرائع کا کہنا ہے کہ قومی اسمبلی کا اجلاس آج دن 4:00 بجے اور سینیٹ اجلاس شام 7 بجے طلب کیا گیا ہے جبکہ وزیراعظم شہباز شریف نے قومی اسمبلی اجلاس سے پہلے وفاقی کابینہ کا اجلاس بھی طلب کرلیا۔

ذرائع نے بتایا کہ کابینہ اجلاس میں آئينی ترمیم کے مسودے کی منظوری دی جائے گی۔

ذرائع کے مطابق عدلیہ سے متعلق آئینی ترمیم میں سپریم کورٹ کے ججوں کی مدتِ ملازمت 65 سال سے بڑھا کر 68 سال کرنے اور ہائی کورٹس کے ججوں کی مدتِ ملازمت 62 سال سے بڑھا کر 65 سال کرنے کی تجویز شامل ہے جبکہ جج تقرری کے طریقہ کار میں بھی تبدیلی کا امکان ہے۔

ذرائع کا مزید کہنا ہے کہ ممکنہ قانون سازی کے مسودے میں جوڈیشل کمیشن اور پارلیمانی کمیٹی کو ایک بنانے کی تجویز آئینی ترمیم کا حصہ ہوگی۔