اسلام آباد: پاکستان پیپلزپارٹی کے چیئرمین بلاول بھٹو نے قومی اسمبلی میں اظہار خیال کرتے ہوئے کہا کہ ہم نےسیاست کوگالی بنادیا ہے جب کہ ہمیں دیکھ کر کوئی سیاستدان نہیں بننا چاہے گا۔

قومی اسمبلی کا اجلاس جاری ہے جس میں اظہار خیال کرتے ہوئے پاکستان پیپلزپارٹی کے چیئرمین بلاول بھٹو نے کہا کہ اسمبلی گیلری میں طلبا، نوجوان اور قوم کے مستقبل بیٹھے ہیں جب کہ ہم نے سیاست کو گالی بنادیا ہے۔

انہوں نے کہا کہ ہمیں اسی سیاست سےعوام کوغربت سےنکالنا ہے، ہمیں دیکھ کرکوئی سیاستدان نہیں بننا چاہے گا۔ یہ بچے ڈاکٹر، انجینئربننا چاہیں گے لیکن سیاستدان کوئی نہیں بننا چاہے گا، یہ بچے ملکی اداروں کے بارے میں کیا سوچ رہے ہوں گے۔

بلاول بھٹو کا کہنا تھا کہ ہم نے اسی سیاست سے نوجوانوں کوروزگار اور ترقی دلانی ہے، اسی سیاست سےعوام کو معاشی تحفظ فراہم کرنا ہے۔ آئین کی بالادستی کے بغیرپارلیمنٹ چل سکتی نہ کوئی اور ادارہ جب کہ حکومت کا کام صرف یہ رہ گیا ہےکہ آج کس کو بند کرنا ہے۔

پاکستان پیپلزپارٹی کے چیئرمین کا کہنا ہے کہ باہر جو سیاست کریں لیکن پارلیمان میں ذمہ داری بنتی ہے، ہم ملک کے منتخب نمائندے ہیں، پارلیمان سپریم ادارہ ہے۔

بلاول بھٹو نے مزید کہا کہ جانتا ہوں کہ اپوزیشن پر کارکنان کا دباؤ ہوگا ان کے رہنما جیل میں ہیں، عوام کو کیا جواب دیں گے جنہوں نے آپ کومنتخب کیا ہے۔ ہماری پالیسیاں غلط ہیں تو اپوزیشن کو بتانا چاہیے۔