اسلام آباد: عوام پاکستان پارٹی کے چیئرمین شاہد خاقان عباسی نے حکومت اور اپوزیشن کو تنقید کا نشانہ بناتے ہوئے کہا کہ تمام اراکین اسمبلی ایک ایس ایچ او کی مار ہیں۔

عوام پاکستان پارٹی کے چیئرمین اور سابق وزیر اعظم شاہد خاقان عباسی نے پریس کانفرنس کرتے ہوئے کہا کہ ایک جلسے کے خلاف اندھے قانون بنارہے ہیں، پہلے قانون بنتے تھے بحث ہوتی تھی لیکن ایک دن میں نہیں بنتا تھا۔

شاہد خاقان عباسی کا کہنا ہے کہ جومرضی سپریم کورٹ فیصلے کرے یہ خود کو قانون کے تابع نہیں سمجھتے، قانون کو بھی ایک جماعت نے سینیٹ، ایک نے قومی اسمبلی سے پاس کرایا جب کہ سپریم کورٹ کے فیصلے پرعمل نہ کرنے کے لیے قانون بنایا گیا۔

ان کا کہنا تھا کہ تمام اراکین اسمبلی ایک ایس ایچ اوکی مار ہیں، آج کوئی ایک بات بھی کرتا ہے تو ایک ایس ایچ او کی مار ہے۔ جلسے کرنا اپوزیشن کا حق ہے جب کہ پی ٹی آئی کے جلسے میں عوام کی کوئی بات نہیں ہوئی اور اسلام آباد میں جلسے سے پہلے ہرجگہ کنٹینرز لگادیے گئے۔

انہوں نے مزید کہا کہ جلسے کی وجہ سے پورے اسلام آباد کو حکومت نے بند کردیا، عوام پاکستان نے دو دن سے کافی معاملہ دیکھا۔ ملک کی بدقسمتی ہے کہ جمہوری حکومت کے ہوتے ہوئے ایسے قانون بنائے جا رہے ہیں جو مارشل لاء میں بھی نہیں بنے۔