لاہور: ملکی اداروں نے بڑی کامیابی حاصل کرلی، انسانی اسمگلنگ میں ملوث بین الاقوامی گروہ قانون کے شکنجے میں آگیا۔

وفاقی تحقیقاتی ایجنسی (ایف آئی اے) لاہور سرکل نے انٹیلی جنس ایجنسیوں کی نشاندہی اور وفاقی وزیر داخلہ محسن نقوی کی ہدایت پر کارروائی کرتے ہوئے انسانی اسمگلنگ کے بین الاقوامی نیٹ ورک کو رنگے ہاتھوں پکڑ لیا۔

ایف آئی اے حکام نے بتایا کہ نیٹ ورک سادہ لوح عوام کو بیرون ملک روزگار کے جھانسے دے کر لوٹتا تھا، ملزمان لوٹ مار اور دھوکہ دہی سے کروڑوں روپے لوٹ چکے ہیں جبکہ منظم گروہ جعلی دستاویزات کی تیاری میں مہارت رکھتا تھا۔

حکام کے مطابق انسانی اسمگلنگ کے گروہ کا اپنا پرنٹنگ پریس بھی تھا، جہاں کئی ممالک کے جعلی پاسپورٹ تیار کیے جاتے تھے۔

ایف آئی اے حکام نے مزید کہا کہ گروہ دینی بنیادوں پر ظلم وستم کی جعلی گواہیاں بھی تیار کرواتا تھا، جعلی گواہیاں بیرونِ ملک پناہ لینے میں استعمال کی جاتی تھیں، بھارتی ایجنٹ مختلف ممالک سے اس نیٹ ورک کو چلاتے تھے۔

گرفتار ملزمان سے دورانِ تفتیش پاکستان کو بدنام کرنے کی بھارتی سازش بھی بے نقاب ہوگئی، پاکستانی پاسپورٹ کو بدنام کرنے کیلئے بھارتی اور افغان شہریوں نے سازشیں رچی، مجرمانہ گروہ بے نقاب ہونے سے کئی پاکستانی اپنا سرمایہ اور عزت کھونے سے بچ گئے ہیں۔

وزیر داخلہ محسن نقوی کی شاباشی

دوسری جانب وفاقی وزیر داخلہ محسن نقوی نے بین الاقوامی نیٹ ورک کو رنگے ہاتھوں پکڑنے پر انٹیلی جنس ایجنسی اور ایف آئی اے لاہور کو شاباشی دیتے ہوئے کہا کہ یہ کامیاب آپریشن انسانی اسمگلنگ کے خلاف پاکستان کی کارروائیوں میں ایک اہم سنگ میل ہے۔

انہوں نے کہا کہ انٹیلی جنس ایجنسی کی معلومات پر ایف آئی اے لاہور نے کامیاب آپریشن کیا جس پر مبارکباد دیتا ہوں۔

محسن نقوی نے مزید کہا کہ انسانی اسمگلنگ روکنے کے اس طرز پر مزید آپریشن جاری رکھے جائیں گے، انسانی اسمگلنگ کے خاتمے کیلئے آخری حد تک جائیں گے، انسانی اسمگلنگ میں ملوث مافیا سے آہنی ہاتھوں سے نمٹا جائے گا۔