صدر مملکت آصف علی زرداری اور وزیراعظم محمد شہباز شریف کی جانب سے کشمیری رہنما سید علی گیلانی کی تیسری برسی پر پیغام دیا گیا ہے۔

صدر آصف زرداری نے اپنے پیغام میں ممتاز کشمیری رہنما سید علی گیلانی کی بھارت کے غیر قانونی طور پر مقبوضہ جموں و کشمیر کے مظلوم عوام کے حقوق کے لیے بہادرانہ جدوجہد کو خراج تحسین پیش کیا ہے۔

انہوں نے اپنے ایک پیغام میں کہا کہ سید علی گیلانی امید اور مزاحمت کی کرن تھے، جس نے لاتعداد کشمیریوں کو حق خود ارادیت کی جدوجہد میں ثابت قدم رہنے کی ترغیب دی۔

آصف علی زرداری نے مزید کہا کہ پاکستان اقوام متحدہ کی سلامتی کونسل کی متعلقہ قراردادوں میں مقبوضہ جموں و کشمیر کے لوگوں کے حق خود ارادیت کے حصول کی وکالت کرتا رہے گا۔

دوسری جانب وزیر اعظم محمد شہباز شریف نے سید علی گیلانی کی تیسری برسی پر پیغام دیتے ہوئے کہا کہ سید علی گیلانی کشمیر کی آزادی کی تحریک کا معتبر نام کے طور پر ہمیشہ یاد رکھے جائیں گے، وہ کشمیری تحریک کے ایک عظیم رہنما تھے جن کا جموں و کشمیر کے عوام کے حق خودارادیت پر پختہ یقین تھا۔

انہوں نے کہا کہ سید علی گیلانی نے پوری زندگی اس مقصد کے لئے وقف کردی، کشمیر کے عوام کی آزادی اور انکی خودارادیت کی جدوجہد کے لئے انکی خدمات ہمیشہ یاد رکھی جائیں گی۔

وزیر اعظم کا کہنا تھا کہ قید و بند کی تکالیف اور صعوبتیں انکے عزم کو کمزور نہ کر سکیں، ان کی قربانیوں کو رائیگاں نہیں جانے دیا جائے گا۔

شہباز شریف نے مزید کہا کہ کشمیریوں کے حق خودارادیت کے حصول تک اس جدوجہد کو جاری رکھا جائے گا، پاکستان کشمیریوں کی اخلاقی، سفارتی اور سیاسی حمایت جاری رکھے گا۔